Łukašenka mała što vykonvaje — i dziakuj Bohu!
Piša Valer Karbalevič.
Siarod vialikaj kolkaści abiacańniaŭ Alaksandra Łukašenki, zroblenych za doŭhija 20 hadoŭ kiravańnia, jość adna cikavaja katehoryja. Heta abiacańni, jakija nie byli vykananyja, ale hramadztva ŭzdychnuła z palohkaj i skazała: dziakuj Bohu.
Samy viadomy prykład — letašni namier kiraŭnika dziaržavy ŭvieści padatak na vyjezd za miažu («100 dalaraŭ z nosu»).
Pierš za ŭsio adznačym, što Łukašenku nie ŭdałosia reanimavać SSSR, choć jon hetaha chacieŭ i navat abiacaŭ.
Uvieś čas jon paŭtaraŭ, što raspad Savieckaha Sajuzu — heta trahiedyja, jakuju nieabchodna pieraadoleć. Paśla padpisańnia dakumentu ab stvareńni Supolnaści Biełarusi i Rasiei 2 krasavika 1996 h. biełaruski prezydent zajaviŭ, što damova «vypraŭlała pamyłku, zroblenuju ŭ 1991 hodzie». Vystupajučy pierad veteranami z nahody Dnia Pieramohi ŭ tym ža hodzie, jon kazaŭ: «My viarnuli vam dziaržaŭny ściah krainy, za jakuju vy vajavali… Prabačcie nam, što my pakul nie zmahli viarnuć vam vašu i našu ahulnuju Ajčynu ŭ šyrokim i hłybokim sensie hetaha słova. Ale ja pierakanany, što heta nam pad siłu. My heta zrobim». Ale paviarnuć koła historyi nie ŭdałosia navat takomu vołatu, jak prezydent Biełarusi.
Asobnaja tema — heta abiacańni Łukašenki rasiejskamu kiraŭnictvu. U čym jon tolki nie zapeŭnivaŭ Maskvu!
Što chutka abjadnajecca z Rasiejaj u adnu dziaržavu. («Ja chaču zajavić, što abiacaŭ narodu na vybarach poŭnuju intehracyju z Rasiejaj, i słova svajo strymaju. I my praviadziem na hetuju temu referendum».) Što ŭ abjadnanaj dziaržavie buduć stvorany adzinyja orhany ŭłady. Što Biełaruś pieraaryjentuje svaje hruzy z partoŭ krain Bałtyi na Kalininhrad. Što pradaść biełaruskija pradpryjemstvy rasiejskim kampanijam.
Łukašenka nia tolki abiacaŭ Rasiei pierajści na adzinuju valutu — u śniežni 2000 hodu navat było padpisanaje adpaviednaje pahadnieńnie.
Jano praduhledžvała, što abjadnańnie hrašovych system adbudziecca ŭ 2005 hodzie. Abiedźvie krainy ratyfikavali dakument. Ale kali nadyšoŭ čas realizavać pahadnieńnie, Łukašenka «kinuŭ» Maskvu.
Kali b Łukašenka vykanaŭ usie svaje abiacańni pasadzić u turmu niadbajnych čynoŭnikaŭ, to zamiest ladovych pałacaŭ u kožnym rajcentry daviałosia b budavać kalonii.
Niamała prykładaŭ niavykananych pahrozaŭ, jakija tyčylisia šarahovych hramadzian. Voś na naradzie pa pytańniach pasiaŭnoj kampanii 19 krasavika 2001 hodu Łukašenka daje taki zahad: «Siońnia palec nia pratyknieš na praspektach Miensku, niemahčyma prajechać — inšamarka na inšamarcy. Dyk voś hetych voś usich numary zapisvajcie, vam Navumaŭ (ministar unutranych spraŭ. — Aŭt.) dapamoža, zaprašajcie — chaj dapamahajuć.
Na kaniec traŭnia kab u mianie była infarmacyja, chto jaki ŭdzieł z bahatych ludziej pryniaŭ u padtrymcy sielskaj haspadarki. Achviaravańni ŭsich, chto siońnia chodzić, poŭzaje, jeździć na inšamarkach pa krainie, pavinny sialanam dapamahčy.
Vy źviarniciesia da ŭsich bahatych subjektaŭ i mnie dałažycie, što jany achviaravali».
Ale va ŭładaŭ chapiła zdarovaha sensu nie raspačynać palavańnia na bahatych ludziej prosta na vulicach. Mahčyma, i tamu, što siarod achviaraŭ mahli apynucca i sami čynoŭniki.
Voś na naradzie pa žyllovym budaŭnictvie 12.09.2012 Łukašenka, aburany tym, što hramadzianie, pabudavaŭšy kvateru na lhotnych umovach, tam nie žyvuć, a zdajuć kvatarantam, daje zahad: «Zdaŭ u arendu — zabiarycie ŭ jaho kvateru».
Adnak u zakanadaŭčym akcie, jaki vyjšaŭ pa vynikach narady, pakarańnie takim hramadzianam było značna źmiakčanaje. Tam na parušalnikaŭ nakładajucca tolki finansavyja sankcyi.
Niadaŭna Łukašenka pryhraziŭ uvieści «pryhonnaje prava» ci to ŭ sielskaj haspadarcy, ci to adnosna čynoŭnikaŭ.
Ale padobnyja pahrozy hučali i raniej. Jašče ŭ 2008 hodzie kiraŭnik Biełarusi kazaŭ: «Pastupiŭ u sielskahaspadarčuju VNU — idzi i pracuj na siało, viedaŭ, kudy išoŭ… Nikomu nia budzie dazvolena prosta adpracavać niejki termin pa raźmierkavańni i pierajści na inšuju pracu. My heta jurydyčna zamacujem. Biez dazvołu staršyni rajvykankamu nichto nia zmoža pierajści na inšuju pracu». Dyk nas čakaje vykanańnie taho abiacańnia praz šeść hadoŭ?
U lubym vypadku, što da Łukašenki, niavykananaje abiacańnie — heta nie zaŭsiody drenna.