BDU choča rearhanizavać humanitarny fakultet, studenty suprać
Studenty humanitarnaha fakulteta BDU pačali kampaniju suprać rasfarmiravańnia fakulteta. Svoj pratest jany kaardynujuć praz supołku «Ukantakcie».
Studenty zaznačajuć, što BDU namierany rearhanizavać humanitarny fakultet, jaki siońnia naličvaje vosiem kafiedraŭ.
U vyniku płanujecca stvaryć fakultet mastactvaŭ, a inšyja kafiedry pierapadparadkavać druhim fakultetam. Studenty suprać takoha rašeńnia, bo jano prymałasia administracyjaj biez abmierkavańnia ź imi.
Taksama studentaŭ turbuje mahčymy pieravod kafiedraŭ dyzajnu i kulturałohii ŭ korpus BDU pa vulicy Majakoŭskaha, 96, dzie ciapier zajmajucca studenty Dziaržaŭnaha instytuta kiravańnia i sacyjalnych technałohij (DIKST).
«Budynak znachodzicca ŭ avaryjnym stanie: pierakryćci budynka draŭlanyja, adsutničaje aciapleńnie, nie pracuje ciepłasietka, vokny zhnili i nie adčyniajucca, kaśmietyčny ramont zrobleny na 10%, častkova nie funkcyjanujuć prybiralni… U sanvuzłach druhoha paviercha adsutničajuć dźviery kabinak, nie pracuje stałovaja i h. d.
Akramia taho, u budynku niedastatkova navučalnych miescaŭ dla raźmiaščeńnia studentaŭ i vykładčykaŭ śpiecyjalnaściaŭ «Dyzajn (kamunikatyŭny)» i «Kulturałohija»,— havorycca ŭ zajavie ad studentaŭ.
Taksama studenty vystupajuć suprać «pierapadparadkavańnia kafiedry kamunikatyŭnaha dyzajnu i kafiedry kulturałohii Humanitarnaha fakulteta Duchanu I. N.» i «pieravodu inšych kafiedraŭ Humanitarnaha fakulteta na inšyja fakultety BDU».
Turbujuć studentaŭ i mahčymyja kadravyja źmieny, źviazanyja z rearhanizacyjaj.
«U advarotnym vypadku vykładčyki padaduć zajavy na zvalnieńnie ŭ suviazi ź niežadańniem pracavać pad kiraŭnictvam novaha načalstva», — havorycca ŭ zajavie.
Studenty zaklikajuć padpisvać zajavu nie tolki ad imia studentaŭ. U supołcy jość i zajava na imia rektara BDU Siarhieja Abłamiejki dla baćkoŭ: u joj jany vystupajuć jak sponsary navučańnia.
230+360
Dekan humanitarnaha fakulteta Uładzimir Hurski maluje nie vielmi aptymistyčnuju karcinu: «Studenty vystupajuć suprać stvareńnia novaha fakulteta i pieravodu častki kafiedraŭ i studentaŭ u korpus na vulicy Majakoŭskaha.
Pakul kančatkovaha rašeńnia ab rearhanizacyi fakulteta niama. Ale inicyjatyva sychodziła ad rektarata BDU. Chočuć uziać kafiedru mastactvaŭ DIKST i kafiedry kulturałohii i dyzajnu humanitarnaha fakulteta i pakłaści ich u asnovu novaha fakulteta mastactvaŭ.
Členy rektarata matyvavali taki krok tym, što Maskoŭski dziaržaŭny ŭniviersitet stvaryŭ taki fakultet, u Sankt-Pieciarburhu stvaryli taki fakultet. Bolš arhumientaŭ nie było.
Ale stvarać novy fakultet nie maje sensu. Abiedźvie kafiedry paśpiachova funkcyjanavali na bazie humanitarnaha fakulteta.
Humanitarny fakultet zastaniecca. Ale rearhanizacyja fakulteta — heta jaho asłableńnie za košt drableńnia. Bo kala rearhanizacyja zakranie kala 30% studentaŭ fakulteta. Heta taksama i pavieličeńnie vydatkaŭ».
Hurski nie abminuŭ uvahaj i budynak, u jaki pierajedzie novy fakultet, kali budzie stvorany.
«Budynak na Majakoŭskaha vielmi stary i znachodzicca nie ŭ lepšym stanie. Tam rabili ramont, adnak u hetym budynku pačynać spravu treba było z dachu, a dach pakinuli, jak jość. Ramont zaklučaŭsia ŭ mantažy hipsakardonnych listoŭ. Bolš pakazušnaha ramontu być nie moža.
Da taho ž hety budynak mały. U im i tak zajmajucca 230 studentaŭ. A ciapier chočuć dadać jašče 360 z našaha fakulteta. Tam prosta nie chopić miesca, nie chopić majsterniaŭ», — skazaŭ jon.
Atrymać kamientary členaŭ rektarata pakul nie ŭdałosia.