U Buda-Kašalovie muž zastreliŭ žonku z-za cyharety i sprabavaŭ zastrelicca sam
U Buda-Kašalovie 35-hadovy mužčyna zabiŭ žonku i sprabavaŭ zastrelicca sam.
Jak paviedamiŭ BiełaPAN aficyjny pradstaŭnik upraŭleńnia Śledčaha kamiteta pa Homielskaj vobłaści Maryja Kryvanohava, kala hadziny nočy 25 maja pamiž mužam i žonkaj razharełasia sprečka z-za kureńnia žančyny.
Mužčyna i žančyna žyli razam užo šmat hadoŭ, a napiaredadni, 24 maja, raśpisalisia ŭ zahsie.
Pavodle słoŭ padazravanaha, žonka abiacała kinuć kuryć paśla viasiella. Adnak viečaram, paśla taho jak jany adznačyli śviata i hości pajšli, mužčyna zaŭvažyŭ žonku z cyharetaj, što jaho vielmi razzłavała, uspychnuła svarka. Śviedkaj hetaha była maci žančyny. Mužčyna, znachodziačysia ŭ stanie mocnaha ałkaholnaha apjanieńnia, uziaŭ strelbu i vystraliŭ žoncy ŭ hałavu, ad atrymanych traŭm jana pamierła na miescy.
Paśla čaho mužčyna streliŭ sabie ŭ horła, adnak kula zatrymałasia ŭ padniabieńni. Maci zabitaj, kali apamiatałasia, patelefanavała ŭ chutkuju i milicyju.
Ciapier mužčyna znachodzicca na lačeńni ŭ rajonnaj balnicy pad kanvojem. Strelba, ź jakoj była zabitaja žančyna, zarehistravanaja, mužčyna źjaŭlajecca palaŭničym. Apošnim časam jon jeździŭ na zarobki ŭ Rasiju, raniej nie sudzimy. Ahulnych dziaciej nie było.
Raspačata sprava ab zabojstvie na padstavie častki 1 artykuła 139 Kryminalnaha kodeksa, viadziecca śledstva, padazrony daje pakazańni.