Miaśnikovič «prabiŭ vakno» ŭ Rasiju dla biełaruskaj sielhastechniki
Premjer-ministr Rasii Dźmitryj Miadźviedzieŭ paabiacaŭ svajmu biełaruskamu kalehu Michaiłu Miaśnikoviču pierahledzieć pytańnie zakupak biełaruskaj sielhastechniki z ulikam jaje łakalizacyi.
U apošni čas ekspart biełaruskaj sielhastechniki ŭ Rasiju mocna pachisnuŭsia. Heta źviazana z tym, što rasijskija ŭłady na zakanadaŭčym uzroŭni abmiežavali padtrymku zakupak luboj techniki, kali jaje łakalizacyja składaje mienš za 30%. Takaja technika aŭtamatyčna ličyłasia zamiežnaj i jaje zakupki ŭžo nie mahli rabicca pry padtrymcy dziaržavy. Da zamiežnaj była adniesienaja i biełaruskaja sielhastechnika, u vyniku čaho rasijski rynak dla biełaruski vytvorcaŭ mocna zvuziŭsia.
Na sustrečy Michaiła Miaśnikoviča i Dźmitryja Miadźviedzieva ŭ liku inšych było zakranutaje i hetaje pytańnie.
Jak paviedamiła pres-słužba Saŭmina, Miaśnikovič tłumačyŭ Miadźviedzievu, što biełaruskaja sielhastechnika niespraviadliva adniesienaja da zamiežnaj, pakolki pry vyznačeńni jaje łakalizacyi nie ŭličvajecca toj važny momant, što mnohija kamplektujučyja dla hetaj techniki kuplajucca mienavita ŭ Rasii. Tak, naprykład, na šmat jakoj technicy stajać ruchaviki Jarasłaŭskaha matornaha zavoda.
Miadźviedzieŭ paabiacaŭ vypravić hetaje nieparazumieńnie i navat daŭ ukazańnie vice-premjeru Rasii Arkadziu Dvarkoviču, kab pry raźliku ŭzroŭniu łakalizacyi ŭličvalisia kamplektujučyja, što nabyvajucca biełaruskimi pradpryjemstvami ŭ Rasii.