Karupcyjnaja sprava namieśnika ministra Lisicy: MUS ahučyŭ padrabiaznaści
Ministerstva ŭnutranych spraŭ Biełarusi paviedamiła padrabiaznaści kryminalnaj spravy byłoha pieršaha namieśnika ministra lasnoj haspadarki Fiodara Lisicy.
Foto BiełaPAN.
Nahadajem, sprava ŭ dačynieńni da jaho pa č. 3 art. 424 KK (złoŭžyvańnie ŭładaj abo słužbovymi paŭnamoctvami) była ŭzbudžanaja Hienieralnaj prakuraturaj pa materyjałach HUBAZiK MUS i Kamiteta Dziaržaŭnaha kantrolu 9 krasavika.
Jak paviedamlaje ŭpraŭleńnie infarmacyi i hramadskich suviaziaŭ MUS,
vykarystoŭvajučy svaje słužbovyja paŭnamoctvy, Lisica arhanizavaŭ za košt srodkaŭ inavacyjnaha fondu Ministerstva lasnoj haspadarki niepravamiernaje vykanańnie ramontu ŭ pradstaŭlenaj jamu dvuchuzroŭnievaj słužbovaj kvatery ŭ ahraharadku Ždanovičy.
Dobraŭparadkavańnie žylla ahulnaj płoščaj 111 kv. m paciahnuła niezakonnaje raschodavańnie biudžetnych hrašovych srodkaŭ amal na 300 młn. rubloŭ.
Jon ža, złoŭžyvajučy słužbovymi paŭnamoctvami, dziejničajučy z karyślivaj zacikaŭlenaści,
ad maja da vieraśnia 2012 h. pražyvaŭ u numary «luks» viedamasnaj haścinicy biez apłaty pradastaŭlenych pasłuh.
Akramia taho, ustanoŭleny supraćzakonnyja dziejańni, učynienyja padazravanym, kali jon byŭ dyrektaram dziaržaŭnaj lesahaspadarčaj ustanovy «Starobinski lashas» Salihorskaha rajona Minskaj vobłaści. U 2005 hodzie, złoŭžyvajučy słužbovym stanoviščam, jon niezakonna zavałodaŭ ziamloj ahulnaj płoščaj 0,95 ha i pabudavaŭ tam katedž. Učastak znachodziŭsia ŭ vodaachoŭnaj zonie kala vioski Jaskavičy Salihorskaha rajona i adnosiŭsia da ziemlaŭ dziaržaŭnaha lasnoha fondu, jakija zajmajuć lasy pieršaj hrupy.
U vyniku niezakonnaha zaniaćcia i vykarystańnia nazvanaha ziamielnaha ŭčastka, z pryčyny źniščeńnia nadhlebavaha pokryva i dehradacyi ziamiel navakolnamu asiarodździu naniesiena škoda na sumu zvyš 1,1 młrd rubloŭ.
U 2008 hodzie Lisica za košt dziaržaŭnaj ustanovy, jakoj kiravaŭ, pabudavaŭ dla siabie słužbovaje žyllo ŭ vioscy Tyčyny Salihorskaha rajona ahulnaj płoščaj 252 kv. m. U nastupnym dom u lik słužbovych žyłych pamiaškańniaŭ dziaržaŭnaha žyllovaha fondu nie ŭklučaŭsia, a byŭ niezakonna pryvatyzavany i aformleny ŭ pryvatnuju ŭłasnaść na lhotnych umovach.