Źmienieny praviły davańnia lhot pry pastupleńni ŭ VNU
Novaj redakcyjaj praviłaŭ pastupleńnia ŭ VNU źmienieny kryteryi dla davańnia lhot abituryjentam.
Jak paviedamiŭ na pres-kanfierencyi 24 sakavika ŭ Minsku ministr adukacyi Siarhiej Maskievič, pry pastupleńni na piedahahičnyja śpiecyjalnaści, pieralik jakich pavinien być vyznačany ministerstvam u pačatku krasavika, prava na zaličeńnie biez ustuplenych vyprabavańniaŭ dajecca pieramožcam abłasnoha abo minskaha haradskoha etapaŭ respublikanskich alimpijad, kali vučebny pradmiet alimpijady źjaŭlajecca dla abituryjenta profilnym pry pastupleńni ŭ VNU.
Akramia taho, anałahičnaje prava na zaličeńnie biez ekzamienaŭ na niekatoryja piedahahičnyja śpiecyjalnaści atrymlivajuć abituryjenty, kali jany majuć załaty i siarebrany miedal paśla zakančeńnia siaredniaj ustanovy adukacyi abo skončyli ŭstanovy siaredniaj śpiecyjalnaj adukacyi z dypłomam z adznakaj. Dla pastupleńnia biez ekzamienaŭ hetyja katehoryi abituryjentaŭ pavinny atrymać rekamiendacyju piedahahičnych savietaŭ ustanoŭ adukacyi, jakija jany skončyli.
Prava na pastupleńnie biez ekzamienaŭ va ŭstanovy adukacyi siłavych struktur i na vajennyja fakultety atrymali
vypuskniki Minskaha suvoraŭskaha vajennaha vučylišča, liceja pry Homielskim inžyniernym Instytucie MNS, kadeckich vučyliščaŭ pry najaŭnaści ŭ dakumiencie ab adukacyi adznak nie nižejšych za 7 bałaŭ pa ŭsich pradmietach vučebnaha płana.
Abituryjenty, jakija majuć dypłomy I, II i III stupieni respublikanskaj alimpijady pa hramadaznaŭstvie, atrymlivajuć 100 bałaŭ pa hramadaznaŭstvie pry pastupleńni ŭ VNU na śpiecyjalnaści «mižnarodnyja znosiny», «mižnarodnaje prava», «pravaznaŭstva», «ekanamičnaje prava», «dziaržaŭnaje kiravańnie i prava». Na inšyja śpiecyjalnaści jany mohuć pastupać biez ustupnych vyprabavańniaŭ.
Prava na zaličeńnie biez ustupnych vyprabavańniaŭ na śpiecyjalnaści fizičnaj kultury i sportu dadziena pieramožcam, pryzioram i ŭdzielnikam Alimpijskich i Paralimpijskich hulniaŭ, pieramožcam aficyjnych čempijanataŭ Biełarusi pa vidach sportu, uklučanych u prahramu letnich i zimovych Alimpijskich hulniaŭ, pieramožcam i pryzioram pieršynstvaŭ śvietu i Jeŭropy siarod invalidaŭ pa zroku, słychu abo z parušeńniem aporna-ruchalnaha aparata.
Majstram sportu Biełarusi i majstram sportu mižnarodnaha kłasa pry pastupleńni na śpiecyjalnaści fizičnaj kultury i sportu vystaŭlajecca adznaka 100 bałaŭ pa dyscyplinie «fizičnaja kultura i sport».
Admieniena pazakonkursnaje zaličeńnie na śpiecyjalnaści, konkurs na jakija ŭ papiarednim hodzie skłaŭ bolš čym piać čałaviek na miesca.
Zachavana patrabavańnie ab najaŭnaści ŭ dakumiencie ab adukacyi adznak nie nižejšych za 6 bałaŭ pa pradmietach ustupnych vyprabavańniaŭ. Dla dziaciej-sirot i dziaciej, jakija majuć rekamiendacyi ad vajskovych čaściej abo orhanaŭ pahraničnaj słužby, i inšych uviedziena abmiežavańnie pa kolkaści miescaŭ dla pazakonkursnaha zaličeńnia da 30% ad kantrolnych ličbaŭ pryjomu.
Zachavana pazakonkursnaje zaličeńnie dla dziaciej-sirot pry pastupleńni ŭ VNU, za vyklučeńniem śpiecyjalnaściaŭ «mižnarodnyja znosiny», «mižnarodnaje prava», «pravaznaŭstva», «ekanamičnaje prava», «dziaržaŭnaje kiravańnie i prava», a taksama miedycynskich.
Da katehoryi asob, jakija zaličvajucca pa-za konkursu ŭ VNU na śpiecyjalnaści fizkultury i sportu, dabaŭleny pieramožcy i pryziory pieršynstvaŭ Biełarusi pa vidach sportu, uklučanych u prahramu letnich i zimovych Alimpijskich hulniaŭ, pry pastupleńni va ŭstanovy adukacyi siłavych struktur i na vajennyja fakultety — vypuskniki Minskaha suvoraŭskaha vajennaha vučylišča, liceja pry Homielskim inžyniernym Instytucie MNS i kadeckich vučyliščaŭ (da 30% ad kantrolnych ličbaŭ pryjomu).
Da katehoryi asob, jakija zaličvajucca pa-za konkursam na śpiecyjalnaści fizkultury i sportu ŭstanoŭ siaredniaj śpiecyjalnaj adukacyi, dabaŭleny pieramožcy i pryziory junackich Alimpijskich hulniaŭ.