Byłaja hiendyrektarka «Słodyča» pisała chadajnictva ab vyzvaleńni ad adkaznaści na imia Łukašenki
Kryminalnaja sprava ŭ dačynieńni da byłoha dyrektara fabryki «Słodyč» Taćciany Sielich, jakaja abvinavačvajecca ŭ prasłuchoŭcy svaich padnačalenych, 19 sakavika nakiravanaja ŭ Minski haradski sud.
Jak paviedamiŭ partału TUT.BY namieśnik prakurora h. Minska Alaksandr Ravucki, abvinavačanaja tak i nie pryznała viny.
Namieśnik prakurora Minska raskazaŭ, što abvinavačanaja napisała chadajnictva ab vyzvaleńni ad kryminalnaj adkaznaści na imia Alaksandra Łukašenki. Adnak zvarot byŭ pakinuty Administracyjaj prezidenta biez razhladu praź nievykanańnie abaviazkovaj umovy dla prašeńnia — pakryćcia škody, naniesienaj u vyniku złačynnych dziejańniaŭ.
Nahadajem, dyrektar za košt pradpryjemstva arhanizavała zakupku śpiecyjalnych techničnych srodkaŭ — kala dvuch dziasiatkaŭ padsłuchoŭvalnych pryładaŭ, jakija pa jaje rasparadžeńni byli ŭstalavanyja ŭ słužbovych kabinietach kiraŭničaha piersanału fabryki.
Ciapier Taćcianu Sielich abvinavačvajuć u ździajśnieńni złačynstvaŭ, praduhledžanych č. 4 art. 16, č. 2 art. 376, č. 3 art. 424, č. 2 art. 203 Kryminalnaha kodeksa RB. Havorka idzie ab arhanizacyi niezakonnaha zbytu śpiecsrodkaŭ, pryznačanych dla sakretnaha atrymańnia infarmacyi; złoŭžyvańni słužbovymi paŭnamoctvami ŭ asabistych intaresach, što paciahnuła naniasieńnie škody pradpryjemstvu ŭ asabliva bujnych pamierach, a taksama ab naŭmysnym parušeńni tajamnicy telefonnych i inšych pieramovaŭ.
Škodu acanili ŭ 202 miljony rubloŭ.
Abvinavačanaja viny nie pryznaje, u chodzie rasśledavańnia admoviłasia ad supracoŭnictva z orhanam kryminalnaha pieraśledu, a taksama, pavodle infarmacyi SK, rabiła sproby pieraškadžać dziejańniam śledčych.
Jak paviedamiŭ pradstaŭnik prakuratury stalicy, paciarpiełymi pa spravie prachodziać asoby, u dačynieńni da jakich było parušanaje prava na tajamnicu telefonnych i inšych pieramovaŭ.
Da abvinavačvanaj jašče ŭ kancy śniežnia 2013 h. była prymienienaja miera strymańnia ŭ vyhladzie zaklučeńnia pad vartu. Ciapier jana znachodzicca ŭ śledčym izalatary Minska.