Minekanomiki kanstatuje nievysoki ŭniosak małoha biźniesu ŭ ekanomiku krainy
Uniosak małoha biźniesu ŭ ekanomiku Biełarusi nievysoki ŭ paraŭnańni ź inšymi krainami, paviedamiŭ na XIV Mižnarodnaj navukovaj kanfierencyi pa pytańniach prahnazavańnia ŭ listapadzie 2013 hoda namieśnik ministra ekanomiki Alaksandr Jarašenka, vystupleńnie jakoha apublikavana ŭ studzieńskim numary «Ekonomičieskoho biulletienia».
«U krainach ź pierachodnaj ekanomikaj rola małoha biźniesu ŭ ekanamičnym raźvićci pakul adnosna nievysokaja. U Respublicy Biełaruś dola małoha biźniesu ŭ ahulnaj kolkaści zaniatych składaje 18,4%, a ŭ ahulnym abjomie VUP krainy — kala 16%. Pry hetym bolšaja častka subjektaŭ pradprymalnictva skancentravana ŭ śfiery absłuhoŭvańnia — 42%, u toj čas jak u pramysłovaści ich dola składaje tolki 15%», — kanstatavaŭ Jarašenka.
Jon źviarnuŭ taksama ŭvahu na toj fakt, što ŭ Biełarusi «praktyčna niama subjektaŭ małoha pradprymalnictva, jakija vypuskajuć pradukcyju pa licenzijach bujnych pradpryjemstvaŭ, niama ich i siarod subpastaŭščykoŭ i subpadradčykaŭ apošnich». «Razam z tym u ekanamična raźvitych krainach na hetym siehmiencie rynku pracujuć 70-80% małych pradpryjemstvaŭ», — nahadaŭ Jarašenka.
U suviazi z hetym, miarkuje namieśnik ministra, pry raspracoŭcy stratehii raźvićcia małoha i siaredniaha biźniesu «akcent pavinien być zrobleny na śfiery vytvorčaści i inavacyjnaj dziejnaści».
«U kožnym rehijonie krainy varta stvarać bazavyja centry padtrymki małoha pradprymalnictva pa akazańni kompleksu pasłuh takim subjektam, u tym liku bazy danych pa pytańniach arhanizacyi i ažyćciaŭleńnia pradprymalnickaj dziejnaści», — skazaŭ Jarašenka.
Častku pamiaškańniaŭ i budynkaŭ, što znachodziacca ŭ kamunalnaj ułasnaści, možna pieradać va ŭłasnaść, arendu ci biazvypłatnaje karystańnie subjektam infrastruktury padtrymki małoha biźniesu, miarkuje namieśnik ministra ekanomiki.
Pavodle danych Ministerstva ekanomiki, u krainach — členach ES uniosak małoha i siaredniaha biźniesu ŭ ekanamičnyja pakazčyki istotna vyšejšy, čym u Biełarusi. Tak, u Hiermanii małyja i siarednija pradpryjemstvy farmirujuć kala 50% VUP, u inšych krainach ES (u pryvatnaści ŭ Italii i Francyi) hety pakazčyk jašče vyšejšy. Razam z tym u Biełarusi ŭniosak małoha i siaredniaha biźniesu ŭ VUP składaje, pavodle danych Minekanomiki, 15,7%.