Vučeńni siłavikoŭ na spartyŭnych abjektach Minska buduć ciahnucca da 7 lutaha
Vučeńni pravaachoŭnych orhanaŭ na spartyŭnych abjektach buduć doŭžycca da 7 lutaha, paviedamiŭ adzin z praviarajučych niezadavolenym hledačam, jakija pryjšli ŭ subotu ŭ Respublikanski centr alimpijskaj padrychtoŭki pa tenisie na matč Kubka Devisa i vymušanyja byli stajać na marozie i vietry ŭ čakańni nadhladu.
Zadača vučeńniaŭ — pošuk mulažoŭ vybuchovych pryład.
Uzmacnieńnie žorstkaści pracedur na ŭvachodzie na spartyŭnyja abjekty adbyłosia na hetym tydni. Vučeńni zakranuli, u pryvatnaści, matč čempijanatu Kantynientalnaj chakiejnaj lihi pamiž minskim «Dynama» i jarasłaŭskim «Łakamatyvam» 29 studzienia. U toj dzień była pamienšana kolkaść kropak propusku, daskanała nadhladalisia nie tolki zaŭziatary, ale i pradstaŭniki ŚMI. U vyniku dla mnohich, uklučajučy dziaciej, čakańnie na 15-hradusnym marozie i praniźlivym vietry raściahnułasia na paŭhadziny. Praz dva dni «Dynama» pryniesła prabačeńni za niazručnaści, adnak dało zrazumieć, što pytańnie adnosicca da kampietencyi pravaachoŭnych orhanaŭ.
31 studzienia vučeńni pačalisia ŭ RCAP pa tenisie, dzie startavaŭ trochdzionny matč pieršaha kruha 2-j hrupy Jeŭra-Afrykanskaj zony Kubka Devisa Biełaruś — Irłandyja. U hety ž dzień staranna nadhledžanyja byli hledačy i žurnalisty, jakija pryjšli na «Čyžoŭka-Arenu» na matč chakiejnaha čempijanatu krainy «Junactva» — «Nioman».