Ceny na sacyjalnyja pasłuhi vyraśli na 40%, piensijaniery skardziacca
U redakcyju «Našaj Nivy» źviarnuŭsia čytač Pavieł Davydzienka, jaki žyvie ŭ pasiołku haradskoha typu Paryčy, što ŭ Śvietłahorskim rajonie. Jaho aburaje, što ad siaredziny studzienia na 40% padnialisia košty na pasłuhu sacyjalnaha supracoŭnika.
«My z žonkaj žyviem udvaich, aboje — invalidy druhoj hrupy, — kaža spadar Davydzienka. — Ja vieteran pracy, a taksama vieteran Čarnobyla. I my daviedalisia, što za pasłuhu sacyjalnaha supracoŭnika ciapier daviadziecca płacić nie sto tysiač rubloŭ, jak toje było raniej, a sto sorak tysiač, što dla nas šmat. Sacyjalny supracoŭnik prychodzić da nas dva razy na tydzień, prynosić małako, paŭchleba, inšyja pradukty. Ja pacikaviŭsia, čamu pasłuha tak padaražeła — mianie nakiravali ŭ Homielski abłvykankam».
Pa słovach spadara Davydzienki žyćcio ŭ Paryčach uvohule nieprostaje. Kali vyklikać «chutkuju dapamohu», to jana ŭ viosku dabirajecca dźvie z pałovaj hadziny. Vialikuju častku hrošaj źjadajuć leki.
U Homielskim abłvykankamie «NN» patłumačyli, što ceny na sacyjalnych supracoŭnikaŭ uźniali, bo apošnija źmieny ŭ cenach byli ažno dva hady tamu.
«Nasamreč, z 18 studzienia ceny pavialičylisia, — kaža načalnica adździeła raźvićcia sacyjalnaha absłuhoŭvańnia i sacyjalnaj dapamohi Natalla Suzdaleva. — Adnak ličba źmianiłasia nie vielmi mocna. Kali raniej pasłuha kaštavała 2400 rubloŭ za hadzinu, to ciapier — 3500 rubloŭ. Lhoty ŭ nas majuć adzinokija i małazabiaśpiečanyja hramadzianie».