Načny terakt u centry Kabuła: zahinuli supracoŭniki AAN i MVF
Śmiarotnik pryvioŭ u dziejańnie vybuchovaje prystasavańnie la ŭvachodu ŭ restaran «Livanskaja tavierna», dzie časta byvajuć zamiežniki i ŭradavyja čynoŭniki.
Paśla hetaha ŭ restaran ŭvarvalisia dvoje bajevikoŭ i adkryli ahoń.
Zahinuli 13 hramadzian Kanady, Rasii, Brytanii i Livana, a taksama vosiem afhancaŭ, u tym liku ŭładalnik restarana. Siarod zabitych — pastajanny pradstaŭnik Mižnarodnaha valutnaha fondu Vabiel Abdałach i supracoŭniki misii AAN.
Restaran, dzie adbyłasia trahiedyja, raźmieščany praz darohu ad ambasady Bielhii. U hetym ža rajonie raźmieščany ambasady Narviehii, Danii, Šviecyi, Brytanii, a taksama niekalki dziaržaŭnych arhanizacyj.
Bajeviki byli zabityja supracoŭnikami słužby biaśpieki, jakija prybyli na miesca napadu.
Karespandent Bi-bi-si paviedamlaje, što vybuch i stralba byli čutny za dva kiłamietry. Pierastrełka praciahvałasia kala 10 chvilin.
U zajavie ruchu «Taliban» havorycca, što hety restaran byŭ vybrany ŭ jakaści abjekta napadu tamu, što ŭ im časta byvajuć zamiežniki.
Na pačatku hetaha tydnia adzin z pradstaŭnikoŭ talibaŭ zajaviŭ, što ruch ŭpeŭnieny ŭ svajoj pieramozie paśla vyvadu z Afhanistana sił mižnarodnaj kaalicyi, jaki naznačany na kaniec hetaha hoda.
Pa słovach karespandenta Bi-bi-si, ciažka pavieryć, što pry ciapierašnim raskładzie sił taliby zdolnyja zachapić uładu, ale nieabchodna pamiatać, što zachop imi Kabuła ŭ 1996 hodzie byŭ niečakanym, i jany mohuć ŭzmacnicca, kali na vybarach u krasaviku hetaha hoda budzie abrany słaby karumpavany prezident.