Vyratavała "Zaviadzionka"
Zavieršyŭsia VI respublikanski festyval biełaruskich filmaŭ
Z 29 vieraśnia pa 3 kastryčnika ŭ Bieraści prachodziŭ fest biełaruskich filmaŭ. Dakumentalnaja karcina Haliny Adamovič vyłučajecca na ahulnym tle.
Z 29 vieraśnia pa 3 kastryčnika ŭ Bieraści prachodziŭ VI respublikanski fest biełaruskich filmaŭ. Studyja "Biełaruśfilm" pradstaviła na feście 11 animacyjnych filmaŭ, 13 dakumentalnych i 8 ihravych.
Karcina Haliny Adamovič "Zaviadzionka" była nazvanaja najlepšym filmam festu, a aperatarka karciny Taciana Łohinava atrymała admysłovy dyplom imia Juryja Maruchina "Za aperatarskaje majsterstva". Raniej stužka Haliny Adamovič hodna pradstaŭlała Biełaruś na mižnarodnych festach - atrymała prestyžny pryz u Karłavych Varach i na feście "Mahnifikat".
"Za viernaść hieroju ideałam dabra j spraviadlivaści" adznačany dakumentalist Anatoli Ałaj, jaki pradstaviŭ karcinu "Ŭładzimier Biadula".
Akramia dakumentalnaha kino, biełaruskaja animacyja taksama vartaja samych ciopłych słoŭ i hladackaj uvahi (chacia hetyja stužki ŭbačyć amal niemahčyma). Najlepšaj animacyjnaj karcinaj pryznanaje "Reaktyŭnaje parasia" Alaksandra Lenkina, a multfilm "Čaroŭnaja krama" Aleny Piatkievič atrymaŭ uznaharodu za najlepšuju vyjaŭlenčuju pracu.
Ź biełaruskim ihravym kino sytuacyja zdaŭna nie takaja aptymistyčnaja, ale biez uznaharodaŭ na feście nie abyścisia. Karcinie Maryi Mažar "Vorahi" dali dyplom "Za najlepšy debiut u kino". Karcinu "Ryfmujecca ź luboŭju" Alaksandra Jafremava nazvali najlepšym ihravym filmam. Stužki Jafremava tradycyjna hanarujucca mienavita na feście ŭ Bieraści - roŭna, jak i na kinafeście ŭ Biardziansku.
Film "Ja pamiataju..." Siarhieja Syčova vyłučyli za najlepšuju muzyku (Viktar Kapyćka), najlepšy scenar (Fiodar Konieŭ), najlepšuju žanočuju rolu (Julija Kaduškievič).
4-seryjny film "Try talery" Ihara Čaćvierykova byŭ nazvany najlepšym videafilmam dla dziaciej.
Admysłovy pryz žury dali Śviatłanie Baroŭskaj za druhaplannuju rolu ŭ filmie "Piaščotnaja zima" režyserak Iryny Vołach i Hanny Parmas. Adpaviednaja ŭznaharoda za druhaplannuju mužčynskuju rolu čakała j Alaksieja Ždanoviča za karcinu "Spakusa" Marharyty Kasymavaj.
Karciny, pradstaŭlenyja na feście ŭ Bieraści, byli vypuščanyja na praciahu niekalkich hadoŭ.