Čatyry čałavieki zahinuli ŭ paniadziełak na trasie Maładziečna — Minsk
Čatyry čałavieki zahinuli 9 śniežnia ŭ DTZ u Maładziečanskim rajonie.
Avaryja adbyłasia siońnia ranicaj kala 7.30 niedaloka ad vioski Krasoŭščyna Maładziečanskaha rajona. Sutyknulisia dva lehkavyja aŭtamabili «Sitrajen-Ksancija» i «Lanča-Libra», a taksama hruzavy «Mersedes».
Heta składany ŭčastak darohi — vuzki, uzhorysty i sa šmatlikimi zavarotami. Tut adbyvajecca šmat avaryj.
U momant DTZ u «Sitraenie» znachodzilisia try čałavieki. Vyžyŭ tolki adzin pasažyr — jon dastaŭleny ŭ Maładziečanskuju centralnuju rajonnuju balnicu.
U aŭtamabili «Lanča» znachodzilisia dvoje, vyžyć nie ŭdałosia nikomu.
Cieły zahinułych udałosia dastać tolki pry dapamozie hidraŭličnaha instrumientu.
«Rehijanalnaja hazieta» źviazałasia z namieśnikam načalnika adździeła pa tyłu MNS Uładzimiram Lacham.
«Pakul dakładnaj infarmacyi pra toje, što nasamreč adbyłosia na trasie, niama. Zdaryłasia trahiedyja, jakaja zabrała žyćci čatyroch čałaviek. Adzin čałaviek, haspadar mašyny Sitraen, jaki siadzieŭ pobač z vadzicielem, vyžyŭ. Z traŭmami (udarami i drapinami) jon dastaŭleny ŭ Maładziečanskaju haradskuju balnicu».
Viadoma, što vadziciel Sitraena małady čałaviek 1983 hoda naradžeńnia. Usie chłopcy jechali na pracu ŭ Zasłaŭje.
Vidavočca avaryi Maksim u hety čas jechaŭ na pracu. Mašyny prapuskali pa čarzie: to z adnaho boku, to z druhoha. Jamu daviałosia stajać kala 10 chvilin:
«Upopierak darohi stała fura, – kaža jon. – Pierad joj na ŭzbočynie stajała mašyna ŭsia ŭśmiatku, byccam słon na jaje nastupiŭ.
Adnym słovam, hruda mietału. Na jaje nakinuli pokryva, mabyć, kab nie šakavać tych, chto prajazdžaŭ pobač. U 20-30 mietrachad jaje – jašče adna mašyna. Taksama ŭsia pabitaja i ŭ kiuviecie. Tut ža pracavali MNSniki i DAIšniki. Žudasnaja avaryja, jak u joj možna było vyžyć choć adnamu čałavieku, – nie viedaju».