Ekśpierymient: ci ratuje flikier u ciemry
Karespandenty Intex-press pravieryli, na jakoj adlehłaści kiroŭca zdolny zaŭvažyć piešachoda ź flikieram i bieź jaho i ci sapraŭdy hetaja «drobiaź» zdolnaja vyratavać žyćcio.
Mnohija piešachody ličać patrabavańnie nasić flikiery prychamaćciu supracoŭnikaŭ DAI. I ŭpeŭnienyja: kiroŭca zaŭvažyć ich u śviatle far navat bieź śviatłoadbivalnaha elemienta.
Karespandenty Intex-press sumiesna z supracoŭnikami rajonnaj DAI na praktycy pravieryli efiektyŭnaść flikieraŭ.
Kali ściamnieła, my vyjechali na trasu. Adzin z supracoŭnikaŭ DAI, pieraapranuŭšysia ŭ ciomnuju vopratku, staŭ piešachodam, inšy sieŭ za rul i razam z karespandentami sprabavaŭ na chadu jaho razhladzieć.
Naš «piešachod» stajaŭ na uzbočynie ŭ adnym i tym ža miescy, tamu my viedali, dzie pavinny jaho ŭbačyć.
Piešachod bieź flikiera. Chutkaść 60 km/h
Pieršy ž ekśpierymient pakazaŭ: navat na chutkaści 60 km/h čałavieka ŭ ciomnym adzieńni i bieź flikiera my zmahli razhladzieć tolki za 25-30 mietraŭ ad aŭtamabila.
Uličvajučy toje, što išoŭ doždž (a tarmazny šlach aŭtamabila ŭ takich umovach składaje kala 35 m), navat na takoj nievialikaj chutkaści piešachod u realnych umovach apynuŭsia b pad kołami.
Piešachod bieź flikiera. Chutkaść 120 km/h
A na 120 km/h my zaŭvažyli piešachoda tolki tady, kali mašyna paraŭniałasia ź im! I heta pry tym, paŭtorymsia, što my viedali, dzie prykładna staić čałaviek. A kali kiroŭca nie čakaje źjaŭleńnia piešachoda?
Piešachod ź flikieram. Chutkaść 60 km/h
Situacyja kardynalna źmianiłasia, varta było našamu piešachodu nadzieć na rukaŭ tonieńkuju śviatłoadbivalnyja pałosku: na chutkaści ŭ 60 km/h my ŭbačyli čałavieka ź flikieram na adlehłaści prykładna ŭ šeść razoŭ bolšaj, čym bieź flikiera!
Takim čynam, navat na mokrym asfalcie pry niečakanym źjaŭleńni na darozie piešachoda ź flikieram kiroŭca paśpieŭ by zatarmazić i paźbiehnuć sutyknieńnia, u toj čas jak nieabaznačany piešachod, chutčej za ŭsio, patrapiŭ by pad koły.
Piešachod ź flikieram. Chutkaść 120 km/h
Praŭda, na 120 km/h na biaśpieku piešachoda flikier ŭžo nie pracavaŭ: my zaŭvažyli čałavieka ź flikieram prykładna na takoj ža adlehłaści, jak na 60 km/h piešachoda bieź flikiera.
Ale hetaj adlehłaści ŭ realnych umovach było b niedastatkova, kab paźbiehnuć najezdu.