Litoŭski ministr pryviazie Łukašenku biezymiannaje zaprašeńnie na samit Uschodniaha Partniorstva
Niepiersanalnaje zaprašeńnie — heta namiok, kab jon nie pryjazdžaŭ.
Ministr zamiežnych spraŭ Litvy Linas Linkiavičus maje ŭručyć Alaksandru Łukašenku zaprašeńnie ŭ kastryčniku. Dla hetaha jon naviedaje Minsk. Dakładnaja data vizitu jašče nie vyznačanaja, paviedamiŭ siońnia premjer Litvy Alhirdas Butkiavičus.
«ES paprasiŭ ministra pajechać u Biełaruś, sustrecca z Łukašenkam i ŭručyć zaprašeńnie ŭ suviazi z sustrečaj «Uschodniaha partniorstva», jakaja budzie prachodzić 28-29 listapada. Ale ŭ zaprašeńni nie ŭpisana proźvišča», — skazaŭ ŭ čaćvier žurnalistam kiraŭnik urada Litvy.
Heta aznačaje prazrysty namiok, kab Alaksandr Łukašenka ŭstrymaŭsia ad pajezdki. Anałahična, jak i ŭ 2009 hodzie, kali na Pražski samit Uschodniaha Partniorstva ad Biełarusi jeździŭ nie jon, a vice-premjer Siamaška.
Butkiavičus nahadaŭ, što Łukašenka zastajecca ŭ vizavym «čornym śpisie» Jeŭrasajuza. Adznačym, što pryčynaj hetamu byli šmatlikija parušeńni pravoŭ čałavieka ŭ Biełarusi.
Miarkujecca, što zamiest kiraŭnika dziaržavy ŭ Vilniu vypravicca ministr zamiežnych spravaŭ Biełarusi Uładzimir Makiej.
Misija pajezdki ŭ Minsk dastałasia Linkiavičusu, bo Litva staršyniuje ŭ ES z 1 lipienia. U 2009 hodzie z anałahičnaj misijaj u Minsk pryjazdžaŭ tahačasny ministr zamiežnych spravaŭ Kareł Švarcenbierh.