Kreml patrabuje ad pakupnikoŭ doli Kierymava va «Urałkalii» adnavić supracoŭnictva ź Biełaruśsiu
Ułady Rasii dali zrazumieć patencyjnym kupcam doli Sulejmana Kierymava va «Urałkalii», što paśla ździełki rasijskaja kampanija pavinna budzie ŭ tym ci inšym vyhladzie ŭznavić supracoŭnictva ź Biełaruśsiu ŭ častcy realizacyi hatovaj pradukcyi.
Ab hetym piša The Wall Street Journal sa spasyłkaj na nienazvanyja krynicy.
Jak ukazvaje vydańnie, takoje patrabavańnie Kramla aznačaje, što pakiet va «Urałkalii» budzie, chutčej za ŭsio, pradadzieny rasijskim inviestaram, a nie zamiežnym.
Za apošni miesiac ŚMI nie raz paviedamlali pra cikavaść da pakieta Kierymava z boku šerahu rasijskich biźniesmienaŭ.
Tak, patencyjnymi pakupnikami aktyvu nazyvalisia ŭładalnik «Ruśśniefti» Michaił Huceryjeŭ, Arkadź Ratenbierh, zasnavalnik AFK «Sistema» Uładzimir Jeŭtušenkaŭ, a taksama «Narnikiel» i «Rośniefť». 13 vieraśnia ŭ presie źjavilisia paviedamleńni, što dolu Kierymava va «Urałkalii» kupiŭ bankir Uładzimir Kohan, adnak hetaja infarmacyja nie paćvierdziłasia.
Pavodle źviestak presy, sam Kierymaŭ hatovy pradać 21,75% akcyj, što jamu naležać, zychodziačy z acenki za ŭvieś «Urałkalij» $19-20 młrd pry rynkavym košcie kampanii prykładna 16 młrd.
Pavodle niepaćvierdžanych źviestak, biznesmen taksama staviŭ umovaj prodažu pakieta viartańnie svajho palityčnaha ŭpłyvu ŭ Dahiestanie.