RBK daily: Biełaruś pajšła na parušeńnie abaviazacielstvaŭ pa pastaŭcy naftapraduktaŭ u Rasiju

Biełaruś pajšła na parušeńnie abaviazacielstvaŭ pa pastaŭcy naftapraduktaŭ u Rasiju, śćviardžaje rasijski biźnies-resurs RBK daily. Kamiercyjny dyrektar «Novatek-Trejdynh» Dźmitryj Husieŭ skazaŭ, što voś užo druhi tydzień na Sankt-Pieciarburhskaj mižnarodnaj tavarna-syravinnaj biržy (SPbMSTB) niama prapanoŭ ad biełaruskich zavodaŭ.

Z kanca žniŭnia na biržavych placoŭkach nie było vystaŭlena nivodnaj tony biełaruskaha paliva, zaznačyŭ Husieŭ. Toje, što ździełak nie było,
paćvierdzili na SPbMSTB. «Vidać, jany stvarajuć reziervy paliva ŭnutry krainy na vypadak abmiežavańnia pastavak rasijskaj nafty», — miarkuje Husieŭ.

RBK daily nahadvaje, što pamiž Biełaruśsiu i Rasijaj dziejničaje tak zvany naftavy bałans: rasijskaja nafta pastupaje na biełaruskija NPZ, a hatovaja pradukcyja viartajecca na rynak RF.

Bałansy byli składzienyja tolki na pieršy, druhi i treci kvartały 2013 hoda. Patrebnaść u dadatkovych abjomach biełaruskaha paliva ŭźnikła, kali sa studzienia hetaha hoda da prodažu na terytoryi Rasii było zabaroniena paliva Jeŭra-2. Hetyja naftapradukty pavinny byli zamiaścić syšoŭšyja abjomy i stać harantyjaj, što bienzinavy kryzis viasny 2011 hoda nie paŭtorycca.

«Usio išło dobra da leta. U lipieni Maskva abvinavaciła Minsk u 
nievykanańni abaviazacielstvaŭ, tamu što abjomy prodažu biełaruskaha paliva na biržy ŭpali.

Na spravie akazałasia, što biełarusy vystaŭlali svoj bienzin, ale popytam jon nie karystaŭsia, tamu što byŭ zanadta darahi.

U Biełarusi jość abaviazacielstva pa pastaŭcy paliva ŭ Rasiju, ale niama abaviazacielstvaŭ pa canie, a taksama rehularnaści pastavak, nahadvaje Dźmitryj Husieŭ. Śledam za biełarusami ceńniki na paliva ŭźniali i rasijskija zavody. U vyniku ŭ lipieni ceny na biržavych placoŭkach uźlacieli na 20%», — zaznačaje RBK daily.

Internet-resurs nahadvaje, što na minułym tydni pamiž Rasijaj i Biełaruśsiu zdaryŭsia novy skandał. Pryčynaj staŭ aryšt biełaruskimi ŭładami hiendyrektara «Urałkalija» Uładzisłava Baŭmhiertniera. Adkaz rasijskaha boku nie prymusiŭ siabie čakać. Zakranuła heta i pastaŭki nafty na biełaruskija NPZ: u vieraśni ŭ suviazi z ramontam na naftapravodzie «Družba» Mazyrski i Navapołacki zavody niedaatrymajuć 400 tys. ton.

Rasijskija ekśpierty zaznačajuć, što adsutnaść biełaruskaha bienzinu nie moža surjozna adbicca na ŭnutranym rasijskim rynku, a taksama pryvieści da deficytu paliva.

«Atrymać kamientaryj u pradstaŭnika «Biełnaftachima» ŭčora nie ŭdałosia. Apieratyŭna prakamientavać navinu ŭ Minenierha nie zmahli.

Kamientary da artykuła