AAN zapuskaje sieryjalnuju viersiju skandalnaha «Vyšej za nieba»

Premjera adbudziecca 8 vieraśnia

AAN vypuskaje sieryjał «Vyšej za nieba» — historyju pra muzyku, chvoraha na ŚNID, źniatuju Dźmitryjem Maryninym i Andrejem Kurejčykam.

Vychad paŭnamietražnaha filma «Vyšej za nieba» adbyŭsia ŭ 2012 hodzie i staŭ sapraŭdy hučnaj premjeraj. Tym nie mienš, zapomniŭsia film nie ŭ apošniuju čarhu skandałam, jaki razharnuŭsia vakoł jaho — tady zamiest sieryjalnaj viersii ŭ siecivie źjaviŭsia «poŭny mietr», a zdymačnaja hrupa nastojvała na tym, što maje poŭnaje prava pakazvać «Vyšej za nieba» na fiestyvalach.

Film nieadnarazova vydalaŭsia ź sierviera YouTube, ale šyroka razychodziŭsia pa sacyjalnych sietkach.
Pra sieryjał, jaki musiŭ vyjści jašče hod tamu, ničoha nie było čutno. Urešcie, 8 vieraśnia na partale Tut.by budzie prezientavana pieršaja sieryja «Vyšej za nieba».

«Sieryjał na Tut.by budzie prezientavany całkam, — kaža śpiecyjalist hrupy kiravańnia hrantami AAN Maša Malinoŭskaja.

— Jon budzie vychodzić pa sieryi ŭ dzień, budzie dastupny da volnaj spampoŭki. Čas, kali sieryjał budzie vychodzić i niekatoryja inšyja padrabiaznaści my paviedamim paźniej».

Ad samaha pačatku havorka išła pra toje, što «Vyšej za nieba» pakažuć pa adnym z centralnych kanałaŭ. Andrej Kurejčyk tady kazaŭ, što ź filma mohuć vyrazać ludziej, jakija znachodziacca ŭ sumna viadomym «čornym śpisie». Čamu ž AAN vyrašyła prezientavać sieryjał u internecie?

«My viadziem pieramovy z telebačańniem. — kaža spadarynia Malinoŭskaja. — Adnak isnuje techničny momant.

U prajm-tajm na lubym kanale idzie rekłama, a „Vyšej za nieba“ niekamiercyjny prajekt, i pieraryvać stužku rekłamaj nielha. Adnak stała zrazumieła, što dalej adkładać jaho vychad niemahčyma, tamu my vyrašyli prezientavać jaho na Tut.by».

Pradstaŭniki AAN spadziajucca, što z vychadam sieryjała skandał vakoł «Vyšej za nieba», jaki časam uspychvaje pa-novaj, skončycca.

Kamientary da artykuła