Dzień biełaruskaha piśmienstva ŭ Bychavie adznačycca rekordam pa skačkach z parašutam i ściaham

Vypuścili i śpiecyjalny miedal, praŭda, «ź nie vielmi kaštoŭnych mietałaŭ».

Adnym ź siurpryzaŭ XX Dnia biełaruskaha piśmienstva, jaki projdzie 1 vieraśnia ŭ Bychavie (Mahiloŭskaja vobłaść), budzie ŭstanaŭleńnie rekordu SND i krain Bałtyi pa skačkach z parašutam i ściaham. Pra heta paviedamiła pieršy namieśnik ministra infarmacyi Lilija Ananič.

«Śviata biełaruskaha piśmienstva maje status nacyjanalnaha. Usia kraina rychtujecca da hetaha dnia.

U Bychavie budzie arhanizavana šmat placovak dla raznastajnych kulturna-aśvietnickich mierapryjemstvaŭ. Ananič akcentavała ŭvahu na mierapryjemstvach u miežach respublikanskaj navukova-aśvietnickaj ekśpiedycyi «Daroha da śviatyń». «Ekśpiedycyja budzie nieści słova vučonych ź niazhasnaj łampadaj duchoŭnaści. Heta toje, što my pramaŭlajem razam, budujučy našu niezaležnuju, suvierennuju Biełaruś. U kantekście słavianskich kultur my zaćviardžajem svajo rodnaje słova, svaju rodnuju Biełaruś», — adznačyła jana.

Śpiecyjalna da jubilejnaha Dnia biełaruskaha piśmienstva vypuščany miedal. Pavodle słoŭ Ananič, «jon zrobleny nie ź vielmi kaštoŭnych mietałaŭ, ale jon budzie hodnaj uznaharodaj dla tych ludziej, jakija na praciahu dvaccaci hadoŭ robiać hetaje śviata».

Namieśnik staršyni Mahiloŭskaha abłasnoha vykanaŭčaha kamiteta Valeryj Małaška paviedamiŭ, što ŭ miežach śviatkavańnia płanujecca ŭstanavić rekord SND i krain Bałtyi pa skačkach z parašutam i ściaham.

Spartsmien-parašutyst mahiloŭskaha aerakłuba Pavieł Navicki razhornie nad Bychavam hihancki ściah Biełarusi. Daŭžynia pałatna składzie 37 m, šyrynia 18,5 m, ahulnaja płošča — 684,5 kv. m.

U miežach śviatkavańnia Dnia biełaruskaha piśmienstva ŭ Bychavie zapłanavana adkryćcio adrestaŭravanych budynkaŭ kinateatra i vakzałaŭ, kancerty zvanaroŭ, choraŭ i zorak biełaruskaj estrady, mižnarodny litaraturny kruhły stoł «Suhučča: mova i litaratura ŭ kantekście historyka-kulturnaj spadčyny», knižnyja vystavy-prodažy. Buduć pracavać maładziožnyja i dziciačyja placoŭki, paviljony «Biełaruskaja kniha i presa», «Prajekty Sajuznaj dziaržavy», projduć prezientacyi dla moładzi srodkaŭ masavaj infarmacyi. Na stadyjonie adbudziecca fiestyval haradoŭ — stalic Dnia biełaruskaha piśmienstva. Zavieršycca śviata kancertam artystaŭ Nacyjanalnaha akademičnaha Vialikaha teatra opiery i baleta.

Kamientary da artykuła