Vice-premjery Biełarusi i Rasii abmierkavali pytańni baraćby z AČS
Biełarusi i Rasii nieabchodna kaardynavać svaje dziejańni pa depapulacyi dzika ŭ pryhraničnych zonach dźviuch krain. Havorka ab hetym išła 8 žniŭnia ŭ Maskvie na sustrečy
Jak paviedamiła Ministerstva sielskaj haspadarki Rasii, udzielniki sustrečy abmierkavali pytańni ŭnifikacyi zakanadaŭstva ŭ baraćbie ź niebiaśpiečnymi zachvorvańniami žyvioł, u tym liku AČS. Adnym z najvažniejšych krokaŭ u hetym kirunku, na ich dumku, źjaŭlajecca «stvareńnie sistem abaviazkovaj identyfikacyi praduktyŭnych žyvioł, a taksama prasočvańnia pradukcyi i kantrolu vykarystańnia charčovych adchodaŭ».
Baki taksama adznačyli važnaść prahnoznych bałansaŭ popytu i prapanovy, jakija dazvalajuć acanić patencyjalnyja mahčymaści vytvorčaści i abjomy spažyvańnia syraviny i hatovaj pradukcyi ŭ APK Biełarusi i Rasii. «Padkreślena nieabchodnaść vykanańnia ŭzhodnienych abjomaŭ u ramkach prahnoznych bałansaŭ popytu i prapanovy, praviadzieńnia pastajannaha manitorynhu ich vykanańnia i karekciroŭki abjomaŭ pastavak u zaležnaści ad situacyi, što składvajecca na rynkach — najpierš na rynku małaka», — adznačajecca ŭ paviedamleńni.
U Biełarusi aficyjna vyjaŭleny dva ačahi AČS — u Iŭjeŭskim rajonie Hrodzienskaj vobłaści i Viciebskim rajonie. U Rasii ŭspyški AČS zarehistravanyja na terytoryi Maskoŭskaj, Tulskaj, Rastoŭskaj, Smalenskaj, Tamboŭskaj, Jarasłaŭskaj i Vałhahradskaj abłaściej.
Biełaruskija ŭłady zajavili, što pryčynaj zachvorvańnia śviniej staŭ zaražany kambikorm, jaki byŭ pastaŭleny pradprymalnikam
Časovaja zabarona na ŭvoz śviniej i śvininy ź Biełarusi ŭviedzieny ŭ Rasii, Ukrainie, Polščy, Litvie i Łatvii. Biełaruś, u svaju čarhu, uviała zabaronu na ŭvoz śvininy z šerahu rehijonaŭ Rasii, dzie vyjaŭleny ačahi AČS.
U Biełarusi dziejničaje respublikanski štab pa baraćbie z AČS na čale ź Michaiłam Rusym. U Rasii rasparadžeńniem Dźmitryja Miadźviedzieva ad 7 žniŭnia stvorana kamisija pa papiaredžańni raspaŭsiudžvańnia i likvidacyi AČS na čale z Arkadziem Dvarkovičam.