Łukašenka pra čumu śviniej: 60 hradusaŭ, pad duš, i virus hinie
Nie rabić katastrofy ź situacyi z afrykanskaj čumoj śviniej (AČS) zaklikaŭ Alaksandr Łukašenka padčas sustrečy z žurnalistami na miescy budaŭnictva akvaparku ŭ Minsku 26 lipienia.
Łukašenka padkreśliŭ, što «heta biada» pryjšła ŭ Biełaruś zvonku. «Ja nie chaču tut nikoha vinavacić, ale, adkul by ni pryjšła heta biada, heta havoryć pra toje, što śviet vielmi ŭzajemaŭviazany, i nam pryjdziecca z hetym zmahacca».
Jon zajaviŭ, što nie bačyć «nijakaj katastrofy», bo virus AČS hinie pry tempieratury 60 hradusaŭ.
U ciapierašniaj situacyi, pavodle jaho słoŭ, najbolšuju tryvohu vyklikaje situacyja z asabistymi padvorkami nasielnictva.
«My ciapier pracujem z nasielnictvam, kab łakalizavać hetyja ačahi, kab jany nie mieli raspaŭsiudžvańnia. Na kompleksach my paradak naviadziem — heta praściej. Ja ŭžo paprasiŭ, kab źviarnulisia da ludziej:
kali takoje zdaryłasia, adpravić na zarez svojskich śviniej. Ci my zabiarem, dziaržava zapłacić, bo niemałyja hrošy płaciać, i ažyćciavić zarez, ci vy sami, doma», — skazaŭ Łukašenka.
Pavodle jaho słoŭ, idzie praca i pa praduchileńni raspaŭsiudžvańnia virusa siarod dzikich žyvioł.
«Što datyčycca kambikarmoŭ, to tut praściej: treba karmić svaimi kambikarmami,a z dabaŭkami pracavać bolš akuratna i praviarać», — zajaviŭ Łukašenka.
«Virus vyjaŭlajecca elemientarna. Kali zaražana žyvioła, jana nijak nie moža trapić na miasakambinat, ale navat kali kryj boža dzieści štości prasačyłasia, to 60 hradusaŭ — vy pad duš stanoviciesia, vada časam bolš haračaja — virus hinie», — skazaŭ kiraŭnik dziaržavy.
Pavodle słoŭ Łukašenki, Kamitetu dziaržbiaśpieki i prakuratury daručana ažyćciaŭlać nahlad za dziejnaściu ŭsich struktur,pačynajučy z urada i zaviaršajučy vieterynarnym uračom peŭnaha ŭčastka, nazirać, jak jany dziejničajuć u hetaj situacyi.
Navat Zachad pryznaŭ, što ŭ Biełarusi efiektyŭna zmahajucca z hetym zachvorvańniem, padkreśliŭ jon.
Łukašenka paraiŭ «nie kuplać miasa na vulicy — lepš na rynku i ŭ mahazinach»,a taksama raskazaŭ, što asabista jon addaje pieravahu kurynamu miasu i jałavičynie. «Ale časam taksama ŭžyvaju i ciapier śvininu. I nie treba dumać, što ŭ prezidenta staić kuča ludziej i praviaraje kožny kavałak ježy — ničoha takoha. Na «Kamaroŭcy», jak i vy, asobnyja pradukty zakuplajem», — zajaviŭ jon.