Śledčy kamitet: Dyrektara «Płaniety» nie zatrymlivali. Naadvarot, milicyjanty prybyli, kab uratavać jaho

Śledčy kamitet abvierh mierkavańnie niekatorych susiedziaŭ dyrektara minskaha hatela «Płanieta», što jon vykinuŭsia z bałkona, kali jaho prybyli zatrymlivać śpiecnazaŭcy.

«Nijakich kryminalnych spraŭ u dačynieńni da hetaj asoby ŭ Śledčym kamitecie nie było i niama. Jaho nichto nie źbiraŭsia zatrymlivać», — paviedamili ŭ adździele infarmacyi i suviaziaŭ z hramadskaściu Śledčaha kamiteta.

Pavodle papiaredniaj infarmacyi śledčych, da doma na vulicy Sadovaj, dzie žyŭ niabožčyk, u dzień trahiedyi sapraŭdy dvojčy vyjazdžała apieratyŭnaja hrupa supracoŭnikaŭ milicyi. Ale jaje vyklikali susiedzi.

«Susiedzi patelefanavali na numar 102 i paviedamili, što na parenčach bałkona na 8-m paviersie siadzić mužčyna i źbirajecca kulnucca ŭniz. Praź niekalki chvilin prybyła apierhrupa, ale jana nikoha nie vyjaviła, — paviedamili ŭ Śledčym kamitecie. — Praź niejki čas susiedzi niabožčyka znoŭ patelefanavali ŭ milicyju i znoŭ paviedamili, što mužčyna siadzić na parenčach bałkona. Milicyjanty vyličyli numar kvatery i pačali padymacca na 8 pavierch. U hety čas mužčyna zvaliŭsia z vośmaha paviercha».

Ciapier nad spravaj pracujuć śledčyja, pravodzicca sudova-miedycynskaja ekśpiertyza, adpracoŭvajucca ŭsie viersii.

Kamientary da artykuła