Upieršyniu sioleta adznačana źnižeńnie terminovych rublovych układaŭ nasielnictva

Pavodle źviestak Nacbanka, na 1 lipienia terminovyja rublovyja ŭkłady fizasob skłali 22,9 trłn. rubloŭ, skaraciŭšysia za červień na 71,8 młrd.

Z pačatku 2013 hoda ŭ Biełarusi naziraŭsia pastajanny rost terminovych rublovych układaŭ nasielnictva. Tak, u studzieni rost terminovych układaŭ fizičnych asob skłaŭ 1,6 trłn. rubloŭ, u lutym — amal 2 trłn. rubloŭ, u sakaviku — taksama amal 2 trłn. rubloŭ, u krasaviku — 1,38 trłn. rubloŭ, u mai — 0,8 trłn. rubloŭ.

Skaračeńnie prytoku terminovych rublovych układaŭ nasielnictva ŭ bankaŭskuju sistemu adbyvałasia na fonie źmianšeńnia dachodnaści pa rublovych depazitach, što było abumoŭlena źnižeńniem staŭki refinansavańnia.

Nahadajem, Nacbank na praciahu sakavika-červienia źniziŭ staŭku refinansavańnia z 30 da 23,5%. U lipieni źmianiać staŭku refinansavańnia rehulatar admoviŭsia. «Siezonnaje pavyšeńnie popytu na zamiežnuju valutu z boku nasielnictva vyznačaje metazhodnaść zachavańnia žorstkaści hrašova-kredytnaj palityki, uklučajučy dziejny ŭzrovień pracentnych stavak u ekanomicy» — tak Nacyjanalny bank arhumientavaŭ niaźmiennaść staŭki refinansavańnia.

Miž tym apytanyja bankiry miarkujuć, što Nacbank vyrašyŭ nie źnižać staŭku refinansavańnia ŭ lipieni z-za aściarohi dałaryzacyi ŭkładaŭ.

Vosieńniu minułaha hoda ŭ Biełarusi na fonie źnižeńnia pracentnych stavak i rostu devalvacyjnych čakańniaŭ układčyki stali pieravodzić rublovyja ŭkłady ŭ valutnyja depazity.

Vosieńniu 2012-ha ŭ bankaŭskaj sistemie naziraŭsia deficyt rublovaj likvidnaści, z-za čaho banki pavialičvali pracentnyja staŭki pa ŭkładach, što spryjała rostu pryvabnaści rublovych depazitaŭ.

U sakaviku hetaha hoda Nacbank adnaviŭ praces źnižeńnia staŭki refinansavańnia, u vyniku čaho dachodnaść pa rublovych depazitach znoŭ stała źmianšacca.

Pačynajučy z druhoj pałovy červienia ŭ krainie adznačajecca rost kursu dołara, što jašče bolš źnižaje pryvabnaść rublovych źbieražeńniaŭ.

Kamientary da artykuła