Śpicie bolš, kali chočacie pažyć daŭžej
Dośledy pakazvajuć, što bolšaść ludziej patrabuje siem-vosiem hadzin snu dziela aptymalnaha funkcyjanavańnia ŭ žyćci. Kali vy rehularna nie dasypajecie, heta moža admoŭna adbicca na vašym zdaroŭi i navat skaracić vaša žyćcio.
Nastupstvy niedastatkovaj kolkaści snu mohuć admoŭna adbicca na vašaj zdolnaści zapaminańnia i pracesie vučeńnia, kreatyŭnaści, praduktyŭnaści, emacyjanalnaj ustojlivaści i fizyčnym zdaroŭi naahuł.
Pavodle admysłoŭcaŭ ź Pitsburskaha ŭniversytetu ŭ ZŠA, niedachop snu moža admoŭna paŭpłyvać na šerah unutranych orhanaŭ čałavieka, takich jak serca, lohkija i nyrki, dy na metabalizm arhanizmu, jaho imunitet i razumovyja pracesy.
Niekatoryja dośledy śviedčać pra toje, što niedachop snu moža pryvieści da niepatrebnaha nabirańnia vahi ci navat atłuścieńnia. Nia tolki tamu, što čałaviek, jaki nia śpić, bolš jeść, ale i tamu, što ŭ ludziej, jakija nie dasypajuć, zamała harmonu, jaki vyklikaje pačućcio nasyčanaści, i zašmat harmonu, jaki pavialičvaje apetyt.
U adnym daśledavańni — u jakim uziali ŭdzieł maładyja zdarovyja mužčyny, jakim nie davali spać bolš čym čatyry hadziny na sutki šeść dzion zapar — vyjaviłasia, što ŭzrovień hlukozu i cukru ŭ ich arhanizmach dasiahnuli takoha ŭzroŭniu, jaki nazirajecca ŭ ludziej na parozie zachvorvańnia dyjabetam.
Ale najbolš pahroźlivy vynik atrymali japoncy, abśledavaŭšy 24 tysiačy žančyn va ŭzroście ad 40 da 79 hadoŭ, jakija nia spali bolš čym šeść hadzin na sutki, i pryjšoŭšy da vysnovy, što imaviernaść zachvorvańnia na rak hrudziej u ich značna bolšaja, čym u tych, jakija spali daŭžej.
Karaciej, kali ŭźnikaje pytańnie — spać ci nia spać? — pryhadajcie sabie hety tekst.