Pavał Jakubovič jašče raz pra A. Suzdalcava i rasijskuju raźviedku
Redaktar «Sovietskoj Biełoruśsii» źmiaściŭ na sajcie nn.by svoj dadatkovy kamentar da spravy A. Suzdalcava, jaki, miarkuje P. Jakubovič, pracavaŭ u Biełarusi na rasijskuju vyviedku.
Pavał Jakubovič |
Redaktar «Sovietskoj Biełoruśsii» źmiaściŭ na sajcie nn.by svoj dadatkovy kamentar da spravy A. Suzdalcava, jaki, miarkuje P. Jakubovič, pracavaŭ na rasijskuju vyviedku ŭ Biełarusi. Voś jahony tekst:
«Šanoŭnaja redakcyja!
Dziakuju za ŭvahu da sajta «SB», u tym liku za prajaŭleny intares da majoj pierapiski z čytačami. Ciapier da spravy. Adkazvajučy naviednikam sajta na pytańnie nakont stupieni majoj «varožasci» da A.I.Suzdalcava, a taksama pierśpiektyvy jaho chvaroby, ja, sapraŭdy, adkazaŭ całkam niedvuchsensoŭna: Suzdalcava ja nie liču voraham (uvohule mnie nie daspadoby takaja acenačnaja katehoryja) i žadaju jamu chutčejšaha vyzdaraŭleńnia. Tamu dazvolcie nie zhadzicca sa śćviardžeńniem šanoŭnaj redakcyi «NN», jakaja nadrukavała ŭsiu hetuju historyju pad zahałoŭkam «Pavał Jakubovič vykryŭ špijona». Špijonaŭ vykryvajuć tak zvanyja «kampietentnyja orhany», a nie žurnalisty. Ale ŭ tym, što A.Suzdalcaŭ, padčas znachodžańnia na terytoryi Biełarusi, vykonvaŭ «dalikatnyja» i całkam akreślenyja daručenni, sumnieńniaŭ u mianie niama. Usie, chto mieŭ nieaściarožnaść niepasredna kantaktavać sa sp. Suzdalcavym, mieli mahčymaść pierakanacca ŭ kankretnasci dziejańniaŭ «palitołaha». Ja taksama! Uspaminaju i našumieły artykuł pra hrubuju «dyskryminacyju ruskaj vulicy» na Biełarusi, a taksama i čas jaje publikacyi — pačatak kanfliktu z «Hazpromam»! Pomnicca, paśla pračytańnia hetaha vybuchovaha materyjału ja praź Sieciva «vyjšaŭ» na Suzdalcava, zaprasiŭ jaho ŭ redakcyju. Doŭhi čas davodziŭ, što, pa-pieršaje, «ruskuju hramadu» na Biełarusi nichto nie dyskryminuje, što, pa-druhoje, moŭnyja i niekatoryja inšyja kulturałahičnyja pracesy, naadvarot, vyklikajuć niepakoj u biełaruskaj tvorčaj intelihiencyi, i, pa-treciaje, što hetak hruba i metanakiravana razdzimać «nacyjanalnaje pytańnie» u našaj krainie moža tolki čałaviek (albo arhanizacyja), jaki maje niadobry «intares». Maje arhumienty sutyknulisia sa ścianoj. Uvohule, davoli chutka ja pierakanaŭsia, što maju spravu z samym što ni na jość prymityŭnym, niahledziačy na frazieałohiju, šavinistam. Adzinaje, što ja skazaŭ tady z horyčču:
- Andrej Ivanavič, mahčyma, u vas nie skłalisia adnosiny ź cioščaj-biełaruskaj? Ale heta nie padstava dla taho, kab pieraniesci niepryjaznaść na Biełaruś.
Praź niekalki dzion ja nadrukavaŭ «Kałonku», dzie publična pieraściaroh sp. Suzdalcava ad praktykavańniaŭ u nackoŭvanni fantastyčnaj «ruskaj vulicy» na «złych biełarusaŭ».
Mnie zdajecca, što tyja, chto šmat piša i havoryć pra «biełaruščynu», ale nie ŭ stanie adroznić šalonuju krytyku Suzdalcavym «łukašyzmu» ad jaho imknieńnia apraŭdać i ŭzmacnić enierhietyčnuju anieksiju «Hazproma», niešta zrazumiejuć...
Ale stavić znak roŭnasci pamiž «patryjatyzmam» i raźviedździejnaściu było b brutalnaściu. U svaim adkazie naviedniku sajta «SB» napisaŭ, što ŭ vajenna-miedycynskich ustanovach Rasii nie prymajucca na lačeńnie ludzi, jakija nie majuć adnosinaŭ da vajennaj słužby. Nie mianiaju punktu hledžańnia! Vartyja žalu namahanni sp. Suzdalcava spasłacca nie niejkija «suviazi» ničoha, akramia śmiechu, u abaznanych ludziej vyklikać nie mohuć. «Vysokija suviazi» u Maskvie harantujuć lačeńnie ŭ klinikach sistemy Kiravańnia Spravami prezidenta Rasii. Ale nie ŭ zakrytych špitalach Minabarony. Jašče raz paŭtaraju: cyvilnaha čałavieka ŭ vajskovuju miedustanovu nie raźmieściać — na heta jość adpaviednyja i strohija narmatyŭnyja akty. Bolš na hetym spyniacca nie budu, usio jasna i tak! Chto nie vieryć, niachaj pasprabuje «pralačycca» u centralnym špitali MA Biełarusi. U Maskvie z hetym jašče stražej. U inšym vypadku zamiest aficeraŭ i hienierałaŭ (ich, uklučna z armijaj adstaŭnikoŭ — mnohija dziesiatki tysiač) u maskoŭskich špitalach lačylisia b tolki «błatnyja». Ale šyški našmat bolš značnyja, čym niejki Suzdalcaŭ — znakamityja akciory, piśmienniki, navat palityki ranhu Žyrynoŭskaha, — lečacca ŭ cyvilnych klinikach, pa miescy «prapiski». Značyć, Suzdalcaŭ maje aficyjnaje prava na vajskovuju «lečprafdapamohu»! Značyć, jon — słužyć! Ale dzie moža słužyć «cyvilny čałaviek», jaki saromiejecca prava na vajennuju lečprafdapamohu? Tolki ŭ śpiecsłužbie. Ja vykazaŭ mierkavańnie, što havorka idzie pra Hałoŭnaje raźviedupraŭleńnie Hienštaba rasijskaj armii — HRU. Suzdalcaŭ abviarhaje. Što ž, mahčyma, Suzdalcaŭ słužyć u inšych śpiecsłužbach. Nie budu piarečyć, heta nie tak važna i mianie mała cikavić. Adno znaju dakładna: Suzdalcava vydvaryli z Minska pa ŭsich farmalnych kanonach uzajemaadnosin śpiecsłužbaŭ. Z farmuloŭkami, jakija istotna adroznivajucca ad tych, jakimi vytłumačvałasia vydvareńnie Stupnikava, naprykład, albo navat češskaha i łatvijskaha dypłamataŭ (nie prypomniu ich prozviščy), jakija ŭ Minsku «zabaŭlalisia» z chłopčykami. U adnosinach ža da Suzdalcava usie mahli pračytać, što padstavy departacyi źviazanyja vyklučna z pytańniami nacyjanalnaj biaśpieki. Źmiest hetych «pytańniaŭ» — zrazumieła, tajamnica, viadomaja tolki Suzdalcavu, jaho maskoŭskamu načalstvu i tym u KDB pa vuł. Kamsamolskaj , chto hetym zajmaŭsia.
Pierad tym, jak pastavić kropku, skažu: «šyć spravu», čaplać cetliki Suzdalcavu nie zbirajusia, pryvioŭ tolki šyroka viadomyja fakty. Maralizavać taksama nie stanu: vykonvaŭ «ruski patryjot» na Biełarusi svaju zadaču — sercu nie zahadaješ, «pahareŭ» — zdarajecca. Nichto ž nie sumniajecca, što navat vielmi siabroŭski nastrojenaja da Biełarusi rasijskaja raźviedka maje na našaj terytoryi svoj «intares»? Našy kontrraźviedčyki, napeŭna, taksama starajucca nie daremna žavać svoj prafiesijny chleb. Łahična?
Jašče raz žadaju Suzdalcavu vyzdaraŭleńnia.
Ale tolki ŭ stanie mocnaj lichamanki možna było śćviardžać, što redaktar «SB» «zrabiŭ usio, kab prybrać mianie ź biełaruskaha palityčnaha pola». Pra departacyju Suzdalcava ja, nasamreč, daviedaŭsia, jak i ŭsie, z pres-relizu KDB. Śmiešna, kali mianie «demanizujuć» i nadajuć mnie łaŭry čałavieka, jaki «prymaje rašenni». Napisać artykuł u hazietu — ja mahu, ale prybrać kahości «z palityčnaha pola»? Heta ŭžo zanadta. Heta, jak lubić vykazvacca paet Zianon, — bzdura!
Uličvajučy chvarobu, a taksama tyja abstaviny, što praŭda kole vočy, možna było i nie zaŭvažyć durnavataj inviektyvy niezdarovaha «palihłota» nakont «vydvareńnia z palityčnaha pola». Ale jaho nastupny pasaž nie lezie, pardon, ni ŭ jakija varoty. Cytuju: «Mienavita jon (Jakubovič. — P.Ja.) sa staronak svajoj haziety abvinavaciŭ mianie ŭ aŭtarstvie niejkich ananimak... Jon... viedaje, chto źmiaščaŭ tyja ananimki. Tam było zadziejničana KDB, i ŭžo vyśvietlili, što hetym zajmaŭsia druhi čałaviek». Uvažliva pračytaŭšy hety blokat, ja tak i nie zmoh zrazumieć, pra jakija «ananimki» i pra jakoje «vyśviatleńnie» razmova? Adzinaje, što ćviorda viedaju i hatovy paćvierdzić na lubym sudovym pasiedžanni — nijakich «ananimak» pra Suzdalcava ci ad jaho imia padčas majho redaktarstva «SB» nie publikavała. Uvohule, hłyboha paharždaju ananimkami, adrazu kidaju ich u śmietnicu — ich prychodzić pa 5 štuk na dzień. Navat sumna viadomy «Biełyj aist» byŭ u svoj čas administracyjna naviazany redakcyi, pra što ja tady ž paličyŭ nieabchodnym pastavić čytača u viadomaść, nazvaŭšy arhanizacyju, jakaja była aŭtaram materyjału.
Suzdalcaŭ piša: «Pavieł Izotavič zaraz prosta apraŭdvajecca». Pierad kim? Pierad Suzdalcavym? Dy kali b naviednik sajta «SB» nie spytaŭ majho mierkavańnia, to ja nikoli b i nie ŭspomniŭ pra Suzdalcava. Ci mała było ŭ maim žycci «stukačoŭ», zasakrečanych i adkrytych, jakija sprabavali zrabić na mnie karjeru? Pierabrechvacca z kožnym? Nie chopić času na žurnalistyku, asabistaje žyćcio i ŭsio astatniaje, što pakul jašče cikava mužyku maich šanoŭnych hadoŭ. Tak što spicie, Andrej Ivanavič, spakojna. U sensie, papraŭlajciesia i pierastańcie udavać ź siabie fihuru, pierad jakoj patrebna «apraŭdvacca».
Šanoŭnaja redakcyja!
Scipła spadziajusia, što vy źmiescicie (u haziecie albo na sajcie) list, meta jakoha rasstavić niekatoryja «akcenty» u hetaj historyi. Adzin z naviednikaŭ sajta «NN» «Nieśviadomy Biełarus» z'iranizavaŭ:
— Jakubovič i Paźniak... Cikavy tandem.
Sapraŭdy «cikavy», ale nie «tandem». U mianie jość šmat padstavaŭ nie adčuvać da Paźniaka pijetet, dumaju, u jaho — nie mienš. Ale heta nie značyć, što ja pavinien bačyć u Z.S. «voraha» i zakryvać vušy, kali jon havoryć całkam razumnyja, z majho punktu hledžańnia, rečy. Pra «špijonaŭ» u tym liku.
Z pavahaj da redakcyi i čytačoŭ «NN»,
Pavieł Jakubovič.»