Kiraŭnika padatkovaj słužby ZŠA zvolnili za pravierki apazicyi
Ministr finansaŭ Džek Lju adpraviŭ u adstaŭku dyrektara padatkovaj słužby krainy Styviena Milera.
Jak paviedamlaje VVS, ministr zrabiŭ heta pa niepasrednym ukazańni Baraka Abamy. Zvalnieńnie adbyłosia, kali stała viadoma, što padatkovaja słužba pravodziła dadatkovyja pravierki pradstaŭnikoŭ apazicyjnych hrup, arhanizacyj, jakija naležać da tak zvanaj Tea Party, kansiervatyŭnaha ruchu ŭ Respublikanskaj partyi.
Padatkovaja słužba pryznałasia, što sapraŭdy aryjentavała svaich inśpiektaraŭ na dadatkovyja pravierki hetaha siehmientu. Uźnik skandał: mnohija pabačyli za hetym palityčny zakaz.
U ZŠA hramadskija arhanizacyi i nieprybytkovyja, niekamiercyjnyja inicyjatyvy vyzvalenyja ad padatkaabkładańnia. U tym liku i palityčnyja supołki, hrupy pa intaresach. Adnak hetaje praviła nie raspaŭsiudžvajecca na łabisckija struktury. Heta i daje padstavu dla dadatkovych pravierak.
Amierykancy śviata šanujuć svaje palityčnyja svabody. Kali stała viadoma, što prezident Niksan padsłuchoŭvaŭ svaich kankurentaŭ, heta kaštavała jamu pasady.
«Ja nie paciarplu takich pavodzinaŭ ni ŭ adnym ahienctvie, ale asabliva ŭ padatkovaj słužbie. Bo jana vałodaje vałodaje vialikimi paŭnamoctvami i maje ŭpłyŭ na žyćcio kožnaha z nas. I ŭsio roŭna, jakich palityčnych pohladaŭ vy prytrymlivajeciesia, ale padatkovaja słužba pavinna pracavać absalutna sumlenna», — skazaŭ Abama.