Maci i siastra Uładzisłava Kavalova prosiać paviedamić ab miescy jaho pachavańnia
Maci i siastra Uładzisłava Kavalova, adnaho z dvuch rasstralanych pa abvinavačańni va ŭčynieńni terakta ŭ minskim mietro, prosiać paviedamić im ab miescy jaho pachavańnia. Jak skazaŭ pravaabaronca Raman Kiślak, adpaviednuju zajavu Luboŭ Kavalova i Taćciana Kaziar adpravili 25 krasavika na imia Alaksandra Łukašenki, staršyni KDB Biełarusi i načalnika departamienta vykanańnia pakarańniaŭ MUS.
Pavodle słoŭ pravaabaroncy, u hetym zvarocie maci i siastra Uładzisłava Kavalova spasyłajucca na rašeńnie Kamiteta pa pravach čałavieka AAN, dzie była razhledžana ich skarha.
U pryvatnaści, kamitet ukazaŭ, što «zachavańnie poŭnaj sakretnaści adnosna miesca pachavańnia ŭjaŭlajuć saboj zapałochvańnie i pakarańnie hetaj siamji šlacham naŭmysnaha ŭtrymańnia ich u stanie niavyznačanaści i dušeŭnych pakut».
Kiślak udakładniŭ, što ŭ svaim rašeńni Kamitet AAN źviarnuŭsia da biełaruskich uład z patrabavańniem paviedamić ab miescy pachavańnia Uładzisłava Kavalova jaho maci i siastry, a taksama apublikavać svajo rašeńnie ŭ srodkach masavaj infarmacyi i pryniać miery, kab takija parušeńni nie dapuskalisia ŭ nastupnym.
«Heta praktyka ŭtojvańnia miesca pachavańnia pakaranych śmierciu ad ich svajakoŭ vychodzić za miežy ćviarozaha sensu. Ja nie ŭjaŭlaju sabie niejkaha razumnaha abhruntavańnia dla zachavańnia takoha staŭleńnia da siemjaŭ rasstralanych», — zajaviŭ pravaabaronca.