Kosiniec pravieryŭ na tryvałaść hranitnyja šary na Uśpienskaj horcy ŭ Viciebsku
Alaksandr Kosiniec (sprava) i Viktar Nikałajkin asabista prainśpiektavali Uśpienskuju horku ŭ Viciebsku.
Alaksandr Kosiniec (sprava) i Viktar Nikałajkin asabista prainśpiektavali Uśpienskuju horku ŭ Viciebsku.
Uviečary 27 sakavika staršyni Viciebskich abłasnoha i haradskoha vykanaŭčych kamitetaŭ Alaksandr Kosiniec i Viktar Nikałajkin asabista prainśpiektavali ŭstanoŭku pomnika ŭ honar patryjarcha Maskoŭskaha i ŭsiaje Rusi Aleksija II, paviedamłaje sajt «Narodnyja naviny Viciebska». Padčas hetaha pracoŭnaha pramienadu kiraŭniki vobłaści i horada taksama vyrašyli pierakanacca, nakolki mocna trymajucca na leśvicy kala Uśpienskaha sabora hranitnyja šary.
Nahadajem, mantaž pomnika Aleksiju II na Uśpienskaj horcy išoŭ za dzień da hetaha, uviečary 26 sakavika. Miarkujučy pa razmovy vysokich čynoŭnikaŭ, jany zastalisia nie vielmi zadavolenyja vynikam pracy budaŭnikoŭ: Kosiniec rasparadziŭsia, kab mer šukaŭ novaha načalnika adnoj z arhanizacyj, jakija ŭdzielničali ŭ vyrabie pastamienta abo mantažy pomnika.
Spuskajučysia pa leśvicy, načalniki vyrašyli pasprabavać na tryvałaść zamacavanyja na parapiecie hranitnyja šary. Kožny vybraŭ pa adnym elemiencie dekoru leśvicy i pasprabavaŭ jaho zrušyć.
Zatym kiraŭnik vobłaści i načalnik horada raźvitalisia ŭnizie leśvicy. Tut Kosinca čakała mašyna. Mer ža praciahnuŭ svoj viačerni pramienad demakratyčna — pieššu.
Adkryćcio pomnika ŭ honar patryjarcha Aleksija II carkoŭnyja i śvieckija ŭłady Viciebska chočuć prymierkavać da śviata Źviestavańnia Najśviaciejšaj Baharodzicy, jaki pravasłaŭnaja carkva adznačaje 7 krasavika. Užo razasłanyja zaprašeńni vysokapastaŭlenym asobam. Čakajecca, što ŭ abłasny centr u hety dzień pryjedzie kiraŭnik Biełaruskaj pravasłaŭnaj carkvy — mitrapalit Minski i Słucki Fiłaret.