Pamierła šviedskaja pryncesa Lilijan
Šviedskaja pryncesa Lilijan pamierła 10 sakavika va ŭzroście 97 hadoŭ u svaim domie ŭ Stakholmie, paviedamlajecca na sajcie šviedskaj karaleŭskaj siamji.
Pryčyna jaje śmierci aficyjna nie nazyvajecca, adnak, jak adznačaje Agence France-Presse, viadoma, što ŭ apošnija hady ŭ Lilijan była chvaroba Alchiejmiera i ŭ cełym słaboje zdaroŭje.
Jana była ŭdavoj prynca Biertyla -- dziadźki ciapierašniaha karala Šviecyi Karła XVI Hustava. Lilijan Devis naradziłasia va Uelsie ŭ 1915 hodzie.U 16 hadoŭ jana pierajechała ŭ Łondan, kab stać madellu i aktrysaj. Tam jana paznajomiłasia ź Biertylem u 1943 hodzie, jana na toj čas była žonkaj brytanskaha akciora Ivana Krejha. U 1945 hodzie Lilijan raźviałasia, adnak baćka Biertyla, karol Hustaŭ VI Adolf, admaŭlaŭsia davać pary svajo błasłavieńnie na šlub, bajučysia, što jon pastavić pad pahrozu isnavańnie dynastyi Biernadotaŭ. Na toj momant Biertyl byŭ spadčyńnikam trona, bo jaho staršy brat zahinuŭ, małodšyja pazbavilisia prava na karonu z-za miezaljansu, a plamieńnik, budučy Karł XVI Hustaŭ, byŭ jašče dziciem.
Niahledziačy na niemahčymaść šlubu, Lilijan i Biertyl žyli razam. Jany zmahli pažanicca tolki ŭ 1976 hodzie, kali Šviecyjaj užo kiravaŭ Karł XVI Hustaŭ.
U pary nie było dziaciej. U 1997 hodzie prync Biertyl, jaki atrymaŭ u Šviecyi mianušku «vydatny prync», pamior va ŭzroście 84 hadoŭ. U 2000 hodzie Lilijan apublikavała miemuary «Majo žyćcio z pryncam Biertylem». Paśla śmierci muža pryncesa ŭziała na siabie šerah jaho abaviazkaŭ, u tym liku źviazanych z uručeńniem uznaharod. U 2006 z-za drennaha zdaroŭja Lilijan spyniła naviedvać bankiet u honar łaŭreataŭ Nobieleŭskaj premii, a ŭ 2007 - i samu cyrymoniju ŭznaharodžańnia. U 2010 hodzie stała viadoma, što ŭ pryncesy chvaroba Alchiejmiera.