Natalla Dańkova: Na mianie akazvajecca psichałahičny cisk

Uładalnik Dankoff Club (kazino, restaran, spa-centr, stryptyz-kłub) užo piać miesiacaŭ znachodzicca pad aryštam.

Siamja Juryja Dańkova. Fota Śviatasłava Zorkaha.

Kazino i kłub znachodziacca ŭ samym centry Minska, na vulicy Miaśnikova. Fota Siarhieja Hudzilina.

Rasśledavańnie kryminalnaj spravy suprać jaho praciahnutaje da 22 lutaha. Juryja Dańkova padazrajuć jaho ŭ tym, što z 2006 jahony kłub byŭ, faktyčna, šyrmaj, a ŭ realnaści heta byŭ publičny dom. Siamja ŭ takoje vieryć nie choča. «Naša Niva» pahavaryła z žonkaj biznesoŭcy Natallaj. Paśla aryštu muža jana ŭznačaliła siamiejnuju spravu.

— Chočuć biznes zabrać, i ja heta adčuvaju, bo mianie presujuć.

«NN»: Jakim čynam?

ND: Nie dajuć pracavać: zamučali pravierkami.

«NN»: Na siońnia kazino pracuje?

ND: Nie. Pracujuć tolki sałon, stryptyz, dyskateka. Kazino ź vieraśnia začyniena. Niemahčyma było pracavać praz pravierki. I tak było, što praviarajučych praviarali inšyja praviarajučyja. Niekalki kamisij.

«NN»: Bačylisia z mužam?

ND: Majoj siamji spatkańni ź im nie dajuć.

«NN»: Praz advakataŭ tolki suviaź?

ND: Tak. Ale advakaty nie ŭsio raskazvajuć, bo bajacca stracić licenzii — usio nadta niadobra.

Šmatdzietny baćka. Juryj Dańkoŭ — baćka čaćviarych dziaciej: traich dačok i syna. Starejšaja, Julija, vučycca va ŭniviersitecie ŭ Vialikabrytanii na płastyčnaha chirurha. Naścia letaś skončyła himnaziju i pastupiła ŭ jurydyčny kaledž BDU. Hieorhij i Jeŭfrasińnia navučajucca ŭ adnoj sa staličnych himnazij.

«NN»: Abvinavačvańnie jamu nie źmianili?

ND: Sprava ŭ tym, što jamu inkryminujecca asabliva ciažkaje złačynstva.

«NN»: Vas taksama dapytvali?

ND: Nie. Ja nie prachodžu pa spravie. Mocny psichałahičny cisk na mianie akazvajecca z boku niezrazumiełych ludziej. Mnie pa načach telefanujuć, pytajucca, ci zajmajusia ja biznesam z aŭtamabilami «Bentli», ci pradaju kotak...

«NN»: Ale Vy nie źbirajeciesia spyniać biznes, raspradavać?

ND: Nie źbirajusia. Maja zadača — zachavać jaho. Za siabie treba zmahacca, za biznes, jakomu Juryj Piatrovič pryśviaciŭ 20 hadoŭ. Heta vialiki termin. Heta i zdaroŭje, i radaści, i hora — usialak byvaje ŭ biznesie. I taho, u čym jaho abvinavačvajuć, niama.

Juryja Dańkova zatrymali 4 vieraśnia. Z hetaha času jon znachodzicca pad vartaj. U kancy žniŭnia zatrymali mastackaha kiraŭnika i administratara Dankoff Club. Spravu zaviali spačatku na ich, a ŭžo praz tydzień aryštavali i ŭładalnika kłuba. Pahražaje im ad siami da dziesiaci hadoŭ turmy z kanfiskacyjaj majomaści.

Kamientary da artykuła