Pad Baranavičami pierakuliłasia mašyna DAI, jakaja dahaniała parušalnika

U Baranavickim rajonie ŭ DTZ paciarpieli dva supracoŭniki Dziaržaŭtainśpiekcyi.

Jak paviedamiła načalnik adździaleńnia pa ahitacyi i prapahandzie DAI UUS Bresckaha abłvykankama Natalla Sacharčuk, 2 śniežnia pryblizna ŭ 18.00 na trasie Baranavičy — Navahrudak niepadalok ad haradskoha pasiołka Haradzišča supracoŭniki Dziaržaŭtainśpiekcyi, jakija ažyćciaŭlali nahlad za darožnym rucham, sprabavali spynić aŭtamabil «Škoda-Aktavija» ź litoŭskimi numarami.

Kiroŭca praihnaravaŭ patrabavańnie spynicca. Jon pavialičyŭ chutkaść i pačaŭ uciakać, nie reahujučy na nieadnarazovyja patrabavańni spynicca pa hučnahavarycieli.

U 18.10 padčas pieraśledu «Škody» ŭ Haradziščy na vulicy Jedunova na zakruhleńni darohi kiroŭca słužbovaha aŭtamabila «VAZ-2170» nie spraviŭsia z kiravańniem, i transpartny srodak pierakuliŭsia. U vyniku DTZ inśpiektar DAI 1988 hoda naradžeńnia, jaki byŭ za rulom «VAZa», atrymaŭ udary pazvanočnika i miakkich tkanak śpiny, a jaho kaleha 1983 hoda naradžeńnia, jaki jechaŭ ź im, — zakrytuju čerapna-mazhavuju traŭmu, strasieńnie hałaŭnoha mozhu, vyciatuju ranu pravaj ruki.

Paciarpiełyja źmieščany ŭ balnicu ŭ Baranavičach

Jak zaznačyła Sacharčuk, sioleta ŭ vobłaści heta pieršaje DTZ z udziełam supracoŭnikaŭ słužbovaha transpartu Dziaržaŭtainśpiekcyi.

«Škoda-Aktavija» była zatrymanaja za kiłamietr ad miesca DTZ, jaje kiroŭca źbieh.

Kamientary da artykuła