Čamu Takindanh nia maje šancaŭ na «Basoviščy»
Pieršaha ŭdzielnika festyvalu «Basovišča-2005» vyznačyli internet-hałasavańniem naviedniki muzyčnaha partału «Tuzin hitoŭ». Im staŭ hurt «Recha». Jašče adnaho ŭdzielnika vyznačyli hledačy adboračnaha kancertu pozna ŭviečary ŭ sieradu. Astatnich šeść hurtoŭ abiare žury.
Lider «Recha» Andrej Takindanh daviedaŭsia pra vynik hałasavańnia ad siabroŭ, bo nia maje kamputara. Toje, što «Basovišča» ŭ apošnija hady było placoŭkaj u asnoŭnym dla ciažkarokavych hurtoŭ, jaho nie zasmučaje: «Miežy paniatku «rok-muzyka» razmyvajucca. U jaje miežy ŭkładajucca nia tolki elektrahitary z prymočkami, ale i muzyka, padobnaja da našaj». «Recha» isnuje kala hodu, u jaho skład uvachodziać šeść čałaviek, a ŭ pieśniach hučyć hitara, bas, skrypka, domra i tamtamy. Hrupa zrabiła furor na apošniaj «Bardaŭskaj vosieni», ale anijakich pryzoŭ nie atrymała — nie ŭkładalisia ŭ rečyšča bardaŭskaj pieśni.
Na dumku Michała Aniempadystava, «Recha» vypadaje z kantekstu, jany adroznyja ad astatnich, tamu pavinny vystupić na «Basoviščy». Im by pasavała eksperymentalnaja scena, kali b takaja była na festyvali. U ahulnaj konkursnaj prahramie ich budzie ciažka acanić, bo jany prezentujuć intelektualny napramak i majuć inšuju estetyku». Akustyka jak takaja ŭsprymajecca tam słaba. U Haradku dobra vypadajuć kamandy z ščylnym hukam.
Sami ŭdzielniki hrupy nastrojeny vykłaścisia na feście napoŭnicu. Andrej maje afrykanskija karani, ale naradziŭsia na Biełarusi. Jaho proźvišča — Takindanh — pierakładajecca jak «zamova suprać śmierci dziciaci». Vučycca va ŭniversytecie kultury na mastaka-restaŭratara. Maryć śpiavać nia tolki pa-biełarusku, ale i pa-francusku, ale pakul nie staje viedaŭ. A pa-biełarusku pišacca niazmušana: «Prosta bolš słovaŭ biełaruskich viedaju». Na prahnoz Słavy Korania, što «Recha» pravalicca na «Basoviščy», adkazvaje taktoŭna: «Dziakuj Koraniu za reklamu».
«Recha» maje papularnaść u Polščy, mienavita adtul jany atrymali bolš za ŭsio hałasoŭ. Na tamtejšych internet-forumach ich pieśniu «Če Hievara» navat pierakłali na polskuju movu. Hurt pastajanna daje kancerty ŭ hetaj krainie i chutka pačnie pracavać nad svaim pieršym albomam u adnoj z varšaŭskich studyj. Ale staŭleńnie lidera «Recha» da muzyki svojeasablivaje: «My, chutčej, hulajem u muzyku: niama žadańnia pryviazvacca da čahości. Majem ad muzyki kajf. Biez kancertaŭ ja b prosta pakutavaŭ».