Жыхар Брэста аддаў махлярам амаль мільён рублёў
66‑гадовы жыхар Брэста амаль год знаходзіўся пад уплывам махляроў.
Фота: Lookby.Media
Прычым падман раскрыўся толькі пасля таго, як мужчына сам звярнуўся ў Нацыянальны банк з просьбай вярнуць грошы.
Як паведамілі ў Следчым камітэце, зламыснікі на працягу года аказвалі на берасцейца псіхалагічны ціск. Яны пагражалі яму крымінальнай справай і ператрусамі.
Пад іх уплывам мужчына пераводзіў грошы на названыя рахункі, а таксама некалькі разоў перадаваў наяўныя кур'ерам.
Агулам ён страціў больш за 960 тысяч рублёў.
Увесь гэты час мужчына, мяркуючы з яго пазнейшага звароту, разлічваў вярнуць грошы пасля так званага дэкларавання. З такой просьбай ён і звярнуўся ў Нацбанк. Тады падман і раскрыўся.