У Беларусь з ААЭ экстрадзіравалі грамадзяніна Мадагаскара, якога вінавацяць у арганізацыі незаконнай міграцыі
Мужчыну падазраюць у арганізацыі незаконнай міграцыі праз Беларусь у Еўрасаюз. Яго перадалі беларускім прадстаўнікам у аэрапорце Дубая і даставілі ў Мінск. Пра экстрадыцыю паведаміла Міністэрства ўнутраных спраў.
Паводле МУС, у чэрвені 2024 года мужчына разам з іншымі людзьмі арганізаваў незаконнае знаходжанне ў Беларусі 13 замежнікаў і іх далейшы выезд у ЕС па-за пунктамі пропуску.
Гаворка ідзе пра грамадзян Бурундзі, Камеруна, Каморскіх Астравоў і Нігерыі.
Грамадзяніна Мадагаскара абвясцілі ў міжнародны вышук праз Інтэрпал. Яго знайшлі ў Аб’яднаных Арабскіх Эміратах, дзе затрымалі і ўзялі пад варту.
Улады ААЭ задаволілі запыт Генеральнай пракуратуры Беларусі аб выдачы мужчыны.