У Маларыце амаль цалкам высахла мясцовае возера. Што з ім сталася?

У Маларыце амаль цалкам высахла Вайсковае возера. На месцы вадаёма засталіся толькі невялікія лужыны, глей і аголенае дно. Відэа з возерам мясцовы жыхар апублікаваў у TikTok, выклікаўшы ў гараджан успаміны пра тое, якім яно было раней, і дыскусію пра прычыны знікнення вады, піша BG.Media.

Вайсковае возера некалькі гадоў таму. Фота з сацсетак

У каментарыях людзі параўноўвалі фатаграфіі возера за лета 2025 і 2026 гадоў. На здымках мінулага года яшчэ бачны паўнавартасны вадаём, а на сёлетніх вады ў ім амаль не засталося.

Вайсковае возера ў 2025 годзе. Фота з тыктока

На тым жа месцы летам 2026 года. Фота з тыктока

Многія маларытчане з настальгіяй успамінаюць, як у дзяцінстве купаліся ў гэтым возеры, гулялі на беразе і назіралі за лебедзямі. Некаторыя спадзяюцца, што вадаём удасца аднавіць і ўпарадкаваць тэрыторыю вакол яго. Людзі прапануюць расчысціць і паглыбіць возера, прыбраць назапашаны глей і зрабіць побач невялікі сквер.

Аднак прычыны знікнення вады выклікаюць спрэчкі. Адны жыхары звязваюць гэта з працяглай засухай і зменамі клімату. Яны адзначаюць, што ў Беларусі другі год запар мелкаводдзе назіраецца ў сажалках, азёрах і калодзежах. Іншыя мяркуюць, што на сітуацыю маглі паўплываць меліярацыя, гаспадарчая дзейнасць і знікненне крыніц, якія раней папаўнялі возера.

Адна з мясцовых жыхарак расказала, што раней у лесе білі крыніцы, з якіх вада трапляла ў возера. Паводле яе слоў, у крынічных ямах вадзіліся буйныя карасі, але пазней крыніцы засыпалі, і вадаём перастаў папаўняцца вадой з іх. Яна дапускае, што гэта магло стаць адной з прычын абмялення.

Некаторыя каментатары таксама звязваюць знікненне вады з будаўніцтвам мясцовага завода, сцвярджаючы, што пра магчымыя наступствы для возера гаварылі яшчэ тады. Аднак гэтыя меркаванні пакуль не пацверджаныя спецыяльнымі даследаваннямі.

Маларытчане згадваюць і іншыя вадаёмы, якія мялеюць або перасыхаюць. У каментарыях гаворыцца пра возера Візжар каля Жабінкі, абмяленне Олтушскага возера, а таксама праблемы з вадаёмамі ў Кобрыне. Падобныя з’явы, паводле паведамленняў карыстальнікаў, назіраюцца і ў Валынскай вобласці Украіны.

Яшчэ летам 2025 года Вайсковае возера ў Маларыце было паўнавартасным вадаёмам. У ліпені раённая газета «Голас часу» паведамляла пра праверку пасля з’яўлення ў сацыяльных сетках інфармацыі пра масавую гібель рыбы.

Начальнік Маларыцкай раённай інспекцыі прыродных рэсурсаў і аховы навакольнага асяроддзя Анатоль Нікіцюк тады расказаў, што спецыялісты абследавалі возера. Масавых захворванняў рыбы не выявілі. Брэсцкая абласная лабараторыя аналітычнага кантролю ўзяла пробы вады, а гідрахімічны аналіз не паказаў перавышэнняў утрымання забруджвальных рэчываў і таксічных злучэнняў. Якасць вады прызналі адпаведнай нормам, а пагрозы для экасістэмы паводле вынікаў праверкі не ўстанавілі.

У канцы лютага 2026 года супрацоўнікі Маларыцкага раённага аддзела ўнутраных спраў разам з прадстаўнікамі мясцовай жыллёва-камунальнай гаспадаркі прыбіралі тэрыторыю каля возера. Работы праводзіліся ў межах рэгулярных мерапрыемстваў па ўпарадкаванні гарадской інфраструктуры і месцаў адпачынку.

Падобная сітуацыя назіралася гэтым летам і ў Брэсцкім раёне. У жніўні 2026 года ў сацыяльных сетках з’явілася відэа цалкам высахлага возера каля вёскі Чэрні, за некалькі кіламетраў ад Брэста. Замест вады там засталося аголенае дно, якое высахла і пакрылася расколінамі. Паводле каментарыяў карыстальнікаў, вадаём пачаў мялець яшчэ раней: адзін з іх успамінаў, што зімой на гэтым месцы ўжо заставалася толькі замерзлая лужына.

У Брэсцкім абласным камітэце прыродных рэсурсаў і аховы навакольнага асяроддзя ў жніўні патлумачылі агульную тэндэнцыю да абмялення вадаёмаў рэгіёна працяглым недахопам ападкаў. Паводле спецыялістаў, дэфіцыт дажджоў назіраецца трэці год запар, а на працягу 2026 года недахоп вільгаці адчуваўся амаль пастаянна. Зніжэнне ўзроўню вады фіксавалі не толькі ў азёрах, але і ў рэках, у тым ліку ў Прыпяці і Ясельдзе, а таксама ў калодзежах.

Экалагічныя спецыялісты папярэджваюць, што простая расчыстка або паглыбленне вадаёма не абавязкова вырашыць праблему. Калі ўзровень грунтавых вод нізкі, умяшанне ў дно можа парушыць воданепранікальны пласт і прывесці да таго, што рэшткі вады будуць сыходзіць яшчэ хутчэй. Таму перад пачаткам работ неабходна высветліць прычыны абмялення канкрэтнага возера.

Каментары да артыкула