У Тульскай вобласці ўзарвалі машыну расійскага вайскоўца, якога Украіна абвінавачвала ў катаваннях ваеннапалонных
Раней Раман Сырамятнікаў працаваў у сістэме выканання пакаранняў.
Фота: сацсеткі
У Новамаскоўску Тульскай вобласці Расіі 2 кастрычніка падарвалі аўтамабіль з удзельнікам вайны.
Пад машынай, якая рухалася, спрацавала бомба, аўтамабіль яшчэ праехаў па інерцыі і ўрэзаўся ў слуп. Кіроўца атрымаў цяжкія траўмы і загінуў. Выбуховае прыстасаванне было закладзена пад дном, дзе месца кіроўцы, паведамляў тэлеграм-канал «ВЧК-ОГПУ».
Загінулым аказаўся расійскі вайсковец — 47‑гадовы Раман Сырамятнікаў. Ён ваяваў на тэрыторыі Украіны ў складзе парашутна-дэсантнай роты 51‑га палка 106‑й дывізіі і быў абвешчаны ў вышук Генеральнай пракуратурай Украіны. У Новамаскоўску ён выкладаў у каледжы, а раней працаваў у сістэме выканання пакаранняў.
Фота: сацсеткі
Украінская пракуратура абвінавачвала яго ва ўдзеле ў катаваннях украінскіх ваеннапалонных.