У Іркуцкай вобласці лабарантка навуковага інстытута памерла ад чумы. Цяпер горад на вушах

У горадзе Шэлехаў Іркуцкай вобласці 28‑гадовая Дар’я Шыпілава, якая працавала лабаранткай у Іркуцкім супрацьчумным інстытуце, памерла ад гэтай самай хваробы.

Дар'я Шыпілава

Як высветліла выданне «Люди Байкала», 25 верасня жанчына разбіла прабірку з узбуджальнікам лёгачнай чумы. Неўзабаве яна адчула сябе дрэнна і была шпіталізаваная ў Шэлехаўскую бальніцу. Там яна правяла тры дні і памерла ў ноч на 2 кастрычніка.

За два гады да гэтага Шыпілава з адзнакай скончыла ардынатуру Іркуцкага дзяржаўнага медыцынскага ўніверсітэта па спецыяльнасці «Клінічная лабараторная дыягностыка».

Пасля яе шпіталізацыі пачалося ўстанаўленне кола кантактаў. Паводле ацэнак крыніц выдання, 1 кастрычніка каля 90 чалавек, якія кантактавалі з Шыпілавай, змясцілі на каранцін у цэнтр, які раней выкарыстоўваўся для пацыентаў з COVID-19. Па стане на 2 кастрычніка колькасць ізаляваных павялічылася прыкладна да 200 чалавек. Жыхары Шэлехава таксама заўважылі на вуліцах людзей у ахоўных касцюмах, масках і пальчатках. Паводле іх слоў, маскі раздавалі і ў дзіцячых садах.

Увечары 1 кастрычніка ў Іркуцку адбылася нарада з удзелам кіраўнікоў сілавых і адміністрацыйных структур. З 1 кастрычніка супрацоўнікі ФСБ, паводле крыніц «Людей Байкала», пачалі суправаджаць машыны хуткай дапамогі, якія дастаўлялі людзей, што кантактавалі з Шыпілавай, на абследаванне.

Журналісты паразмаўлялі з доктарам, знаёмым з лячэннем цяжкіх інфекцый. Ён растлумачыў, што чуму лечаць вялікімі дозамі антыбіётыкаў. Паводле яго слоў, існуюць дзве асноўныя формы захворвання — бубонная і лёгачная. Бубоннай формай можна заразіцца, напрыклад, праз укус грызуна, і ад чалавека да чалавека яна не перадаецца. Лёгачная ж форма можа перадавацца паміж людзьмі і з'яўляецца вельмі заразнай.

Лекар адзначыў, што пры выпадку асабліва небяспечнай інфекцыі інфармацыя можа распаўсюджвацца не адразу. Могуць уводзіцца абмежаванні на ўезд і выезд, а да правядзення каранцінных мерапрыемстваў могуць прыцягвацца сілавыя структуры. Медыцынскія работнікі пры гэтым звычайна не маюць права самастойна каментаваць сітуацыю журналістам. Інфармацыю ад бальніцы павінен даваць упаўнаважаны прэс-сакратар.

Паводле спецыяліста, каранцін такога ўзроўню ўводзяць пры вельмі абмежаванай колькасці асабліва небяспечных інфекцый, сярод якіх чума і натуральная воспа. Дыягностыкай у такіх выпадках займаюцца буйныя спецыялізаваныя інстытуты, да расследавання могуць падключацца эксперты з іншых гарадоў, у тым ліку з Масквы і Санкт-Пецярбурга.

Пасля выяўлення падазрэння на небяспечную інфекцыю адпаведныя службы перадаюць інфармацыю па інстанцыях, аддзяленне могуць закрыць, пачынаецца эпідэміялагічнае расследаванне. Спецыялісты бяруць неабходныя аналізы і праводзяць даследаванні. Паводле доктара, пасля пасеваў і выяўлення ўзбуджальніка на атрыманне вынікаў можа спатрэбіцца каля шасці дзён.

Каментары да артыкула