«Пакінуў 10 капеек у пад'ездзе, прыклееныя скотчам». Незвычайны канфлікт у мінскім шматпавярховіку
З нечаканым (і самавольным) рашэннем суседа сутыкнуліся жыхары дома №32 на вуліцы Прытыцкага ў Мінску. Адзін з жыхароў прызвычаіўся падсілкоўваць свой электрасамакат… проста ў пад’ездзе, ад агульнай разеткі.
«Адных такая прадпрымальнасць абурыла, іншыя лічаць кошт зарадкі занадта нязначным, каб ладзіць канфлікт», — інтрыгуе мінчук Раман, які з самага пачатку назірае за развіццём сітуацыі, піша Onliner.by.
— Самакат з’яўляецца ў холе некалькі разоў на тыдзень, звычайна ўвечары, а раніцай знікае, — расказвае мінчанін. — Разетка адносіцца да месцаў агульнага карыстання, значыць, электрычнасць аплачвае ўвесь дом. Атрымліваецца, чалавек ездзіць па сваіх справах, а патроху скідваемся на гэта ўсе мы. Сёння самакат, заўтра хто-небудзь аўтамабіль праз акно падключыць.
Спачатку жыхары пакінулі на стырне запіску з просьбай зараджаць транспарт у кватэры. На наступны дзень побач з’явілася другая цыдулка, ужо ад уладальніка самаката: «Поўная зарадка каштуе некалькі капеек. Магу пакласці грошы на падаконнік».
Грошы ён сапраўды пакінуў: манету наміналам 10 капеек прыляпілі скотчам каля разеткі. Гэта канчаткова падзяліла суседскі чат на два лагеры.
Адны палічылі ўчынак здзекам, іншыя прапанавалі купіць на пакінутыя грошы гарбату для сходу жыхароў.
Як высветлілася, уладальнік самаката (малады чалавек) не заносіць сваю маёмасць дадому з-за незадаволенасці сваякоў. Маўляў, пасля дажджу самакат брудны, а кватэра невялікая.
— Аргументы гаспадара самаката такія: у пад’ездзе ён нікому не перашкаджае, праход не перакрывае, а адна зарадка абыходзіцца танней за кубак вады ў кавярні (акумулятар на 500 ват-гадзін). Кажа, калі пытанне прынцыповае, гатовы кампенсаваць выдаткі на год наперад, — перадае словы суседа Раман.
Адкуль у пад’ездзе ўвогуле дзейная разетка? Раман кажа, што яна прызначаная для прыбіральнага абсталявання і правядзення тэхнічных работ сіламі мясцовага ЖКГ. Падключаць да такой разеткі асабістую тэхніку жыхарам не дазваляецца, незалежна ад аб’ёму спажытай электраэнергіі.
— Пасля майго звароту разетку паабяцалі абсталяваць ахоўнай крышкай з замком. Праўда, ёсць асцярогі, што ключ згубіцца і падчас уборкі супрацоўнікам давядзецца выкарыстоўваць падаўжальнік, — непакоіцца малады чалавек.
Сёння самакат перамясціўся на лесвічную пляцоўку другога паверха. Ці падключаны ён там да іншай разеткі, жыхары пакуль не высветлілі.