Марока назвала дзве прычыны наплыву мігрантаў у Сеуту
У Марока пакуль не вярнуліся больш за дзве тысячы чалавек з 70 тысяч.
Фота: Antonio Sempere / AP
Міністэрства ўнутраных спраў Марока афіцыйна растлумачыла прычыны масавага патоку мігрантаў у іспанскую Сеуту на мінулым тыдні, піша Bild.
Першая прычына — ілжывая інфармацыя ў сацыяльных сетках. Наплыў мігрантаў узнік спантанна, заявіў прадстаўнік міністэрства. Многія мігранты расказвалі іспанскім СМІ, што даведаліся пра нібыта адкрытую мяжу дзякуючы відэа і паведамленням на такіх платформах, як тыкток.
Другая прычына, паводле мараканскага міністэрства, — няправільнае тлумачэнне рашэння іспанскага суда, згодна з якім затрыманых у моры мігрантаў больш нельга неадкладна вяртаць назад.
Разам з тым Марока пацвердзіла сваю прыхільнасць барацьбе з нелегальнай міграцыяй.
Аднак гэтай заяве супярэчаць даныя іспанскіх сілавых структур, паводле якіх мараканскія памежнікі незадоўга да масавага перасячэння мяжы адышлі ад мяжы з Сеутай. Як паведамляюць іспанскія СМІ, некалькі мігрантаў незалежна адзін ад аднаго расказалі, што іх не спынялі, а наадварот — заахвочвалі да перасячэння мяжы.
У Марока пакуль не вярнуліся больш за дзве тысячы чалавек. Паведамляецца, што сітуацыя на ўзбярэжжы Сеуты стабілізавалася.
«Амаль усе, хто прыбыў у Сеуту, на гэты момант ужо вярнуліся ў Марока», — напісаў у сацыяльнай сетцы X міністр замежных спраў Іспаніі Хасэ Мануэль Альбарэс.
Паводле даных Міністэрства ўнутраных спраў Іспаніі, у Сеуце ўсё яшчэ знаходзяцца каля дзвюх з паловай тысяч грамадзян Марока. Карэспандэнт Bild Дзмітрый Зойбель таксама паведаміў, што ў іспанскім эксклаве застаюцца сотні мігрантаў.