У цэнтры Варшавы паляк напаў на беларуску пасля таго, як пачуў яе акцэнт
Ён пачуў акцэнт і пачаў выкрыкваць універсальныя абразы: «Spi***dalaj do Ukrainy».
Скрыншот відэа
Каля Rondo ONZ у цэнтры Варшавы адбылося нападзенне на дзяўчыну з Беларусі, піша «Рэальная Варшава».
Паводле слоў пацярпелай, падчас тэлефоннай размовы незнаёмы мужчына крыкнуў ёй: «Адыдзі, карова». Спачатку яна не зразумела, што звяртаюцца менавіта да яе. Калі дзяўчына саступіла дарогу і па-польску сказала, што не зразумела, што мужчына звяртаўся да яе такім чынам, ён пачуў акцэнт і пачаў выкрыкваць універсальныя абразы: «Spi***dalaj do Ukrainy».
Дзяўчына дастала тэлефон і адказала, што яна беларуска. Пасля гэтага мужчына назваў яе «рускай шматай», падбег і ўдарыў па твары. У гэты момант запіс абарваўся.
Пацярпелая выклікала паліцыю, спрабавала дагнаць нападніка і прасіла мінакоў дапамагчы яго затрымаць, але ніхто не ўмяшаўся, і мужчына збег.
Дзяўчына падала заяву ў паліцыю і перадала відэазапіс, на якім добра бачны твар нападніка. Паводле яе слоў, з моманту звароту яна пакуль не атрымала ніякай інфармацыі пра ход расследавання.