Ігар з Гродна схлусіў, што ён удзельнік вайны. Але расчуленая расіянка ўжо перавяла яму $2700
Расійскі суд патрабуе вярнуць грошы, а след беларуса даўно прастыў.
Ігар Макей
33‑гадовы беларус Ігар Гроцкі, які, мяркуючы па сацсетках, жыве паміж Гроднам і Масквой, пабагацеў на $2700. Гэтыя грошы яму перавяла жыхарка Падмаскоўя Наталля Сасуліна.
Жанчына пазнаёмілася з ім у лістападзе 2023 года. Ігар назваўся чужым іменем, схлусіў, што ваеннаслужачы, удзельнік «СВА». А паколькі трапіў у цяжкую сітуацыю, то папрасіў пераводзіць яму грошы на рахунак у «Сбербанку», абяцаючы хутка вярнуць. За некалькі месяцаў жанчына зрабіла 12 пераводаў. Пасля гэтага Ігар перастаў адказваць на паведамленні і знік.
Калі Наталля Сасуліна зразумела, што перад ёй быў не «герой СВА», то пайшла вяртаць грошы ў суд. У рашэнні суда сказана, што Гроцкі павінен аддаць ёй тыя самыя $2700, але паколькі беларус на пасяджэнне не з’явіўся, відавочна, што спагнаць грошы з яго не так проста.
У тыктоку ёсць асобны канал, на якім сабраліся пацярпелыя ад Ігара Гроцкага. Называюць яго альфонсам і кажуць, што ён спецыялізуецца на жанчынах 35+.