Расійскую рэкламшчыцу з Мсціслава асудзілі за палітыку
Ірына Дундукова доўгі час працавала ў сферы рэкламы і маніторынгу СМІ паміж Беларуссю і Расіяй. Але нядаўна ёй вынеслі прысуд за «садзейнічанне экстрэмісцкай дзейнасці».
Ірына Дундукова. Фота з яе старонкі Укантакце
Ірыне Дундуковай 39 гадоў. Яна родам з Мсціслава, што ў Магілёўскай вобласці, аднак значную частку жыцця правяла ў Маскве. У 2011 годзе яна скончыла гуманітарны факультэт Маскоўскай фінансава-юрыдычнай акадэміі (МФЮА) па спецыяльнасці «рэклама».
Доўгі час Ірына працуе кантэнт-менеджаркай, рэдактаркай і спецыялісткай па маніторынгу СМІ. Яна займалася напаўненнем сайтаў, стварэннем фота– і відэаархіваў, а таксама аналітыкай сацыяльных сетак. У канцы 2023 года Ірына набыла шчанюка пароды коргі-кардыган па мянушцы Фоксі, пра якога шмат пісала ў тэлеграм-чатах сабакаводаў.
Ірына пісала ў сацсетках, што жыла ў прыватным доме ў Падмаскоўі, працавала дома і перыядычна ездзіла ў Беларусь да бацькоў.
Яе затрымалі, падобна, падчас адной з паездак у Беларусь. Магілёўскі абласны суд вынес Ірыне Дундуковай прысуд паводле частак 1 і 2 артыкула 361‑4 Крымінальнага кодэкса Беларусі, садзейнічанне экстрэмісцкай дзейнасці.
Жанчыне прысудзілі хатнюю хімію.
Чытайце таксама:
Айцішніка з вялікім досведам асудзілі за «фінансаванне экстрэмізму» і зброю
Уладальніка кампаніі-прадаўца на Wildberries і Ozon асудзілі па палітычнай крыміналцы