Ва Украіне затрымалі арганізатара вайсковай выставы пад Кіевам, у выніку расійскага ўдару па якой загінулі дзесяць чалавек
На выставу запрасілі больш за 300 чалавек, пры гэтым найбліжэйшае сховішча знаходзілася прыкладна за 100 метраў ад месца правядзення мерапрыемства.
Ва Украіне затрымалі арганізатара вайсковай выставы пад Кіевам, у выніку расійскага ўдару па якой загінулі дзесяць чалавек, каля ста — пацярпелі. Пра гэта паведаміў генеральны пракурор краіны Руслан Краўчанка.
«Паводле даных следства, адна з асацыяцый вытворцаў узбраенняў без якіх-небудзь узгадненняў з вайсковым камандаваннем, абласной і раённай вайсковымі адміністрацыямі, а таксама іншымі ўпаўнаважанымі органамі арганізавала маштабнае мерапрыемства з удзелам вайскоўцаў, прадстаўнікоў дзяржаўных органаў, міжнародных партнёраў і бізнэсу. Праграма прадугледжвала дэманстрацыю сродкаў супрацьпаветранай абароны», — адзначыў ён.
Паводле слоў Краўчанкі, на выставу запрасілі больш за 300 чалавек, пры гэтым найбліжэйшае сховішча знаходзілася прыкладна за 100 метраў ад месца правядзення мерапрыемства.
«Гэта азначае, што сотні людзей з самага пачатку знаходзіліся ва ўмовах відавочнай рызыкі для бяспекі. Запрашэнні былі разасланыя за дзевяць дзён да мерапрыемства, а дакладныя месца і час паведамілі за суткі. Следства правярае, ці маглі гэтыя дзеянні паспрыяць таму, што вораг атрымаў магчымасць падрыхтаваць мэтанакіраваны ўдар», — дадаў ён.
Затрыманаму галоўнаму арганізатару выставы выставілі абвінавачанне ў службовай халатнасці.