«За паўгадзіны — 350 аўтографаў». Як Арына Сабаленка адкрывала ў Мінску тэнісныя корты

Нечаканы для многіх прыезд у Мінск першай ракеткі свету Арыны Сабаленкі выклікаў сапраўдны ажыятаж сярод беларусаў. У аўторак Арына адкрывала тэнісныя корты і правяла майстар-клас у сваёй роднай школе «Змена», а паглядзець на знакамітую спартсменку прыйшлі сотні жыхароў сталіцы, піша Onliner.by.

Фота тут і далей: Анлайнер

«Арына, выходзь! Давайце паклічам яе, як Снягурку!»

Трапіць на сустрэчу з зоркай было няпроста: заўзятарам трэба было прайсці папярэднюю рэгістрацыю, якую арганізаваў партнёр Арыны — праект First&Red. Астатнія месцы ўвогуле разыгрываліся.

І нават нягледзячы на будны дзень, да школы №86 у завулку Казлова прыйшлі сотні чалавек. Цяжка ўявіць, колькі гледачоў сабралася б тут у выхадны.

З-за вялікай колькасці людзей яшчэ на падыходзе да школьнага стадыёна ўзнікла невялікая блытаніна: каля аднаго ўваходу людзей накіроўвалі да іншага, а адтуль — зноў назад. Хтосьці ў выніку вырашыў не марнаваць час і проста пераступаў праз чырвоную стужку, якая служыла своеасаблівай агароджай.

Знайшліся і тыя, хто незадаволена наракаў, што з-за прыезду спартсменкі не змог нармальна прыпаркаваць аўтамабіль. Але, вядома, большасць прысутных былі радыя пабачыць знакамітую беларускую тэнісістку.

— Арына, вы-хо-дзь! Давайце паклічам яе, як Снягурку! — прапанаваў адзін з адданых заўзятараў беларускай тэнісісткі яшчэ задоўга да таго, як збіраліся адкрыць вароты СДЮШАР. Праўда, людзі, якія стаялі побач, яго энтузіязму не падзялілі. Неўзабаве падышоў ахоўнік і папрасіў так не рабіць: усяму свой час.

Ужо за гадзіну да прыезду Арыны заўзятары пачалі займаць найлепшыя месцы. Праўда, не ўсе адразу здагадаліся, якім шляхам яе будуць весці, таму некаторым у апошні момант давялося перамяшчацца і шукаць больш удалае месца.

«Вельмі прыемна бачыць столькі дзяцей, якія мяне падтрымліваюць і надаюць мне столькі сіл!»

Тэнісістка выйшла ў суправаджэнні аховы, жаніха Георгіяса Франгуліса, трэнераў і старшыні Мінгарвыканкама Уладзіміра Кухарава.

— Вялікі дзякуй усім, хто прыйшоў. Вельмі прыемна бачыць столькі дзяцей, якія мяне падтрымліваюць і надаюць мне сілы. Дзякуй усім, хто побач, у тым ліку і мэру, за тое, што падтрымалі гэтую ідэю. Я пачынала ў «Змене», адсюль выйшла, дайшла да самай вяршыні спорту і спадзяюся, што такія прыгожыя корты дапамогуць нарадзіцца новым зоркам, якія будуць скараць вяршыні тэніса разам са мной і пасля мяне. Спадзяюся, гэтае мерапрыемства дапаможа дзецям стаць лепшымі і скарыць гэты свет, — падзялілася перад адкрыццём кортаў сваімі ўражаннямі Сабаленка.

Адразу пасля гэтага тэнісістка і іншыя высокапастаўленыя госці перарэзалі чырвоную стужку — і ўсё дзеянне перамясцілася на корт.

Неўзабаве заўзятары акружылі пляцоўку, сталі ў некалькі шэрагаў, а некаторыя назіралі за тым, што адбываецца, праз агароджу.

Хтосьці нават выйшаў паглядзець на тэніс з балкона суседняга дома.

— Ну, Арына, чаго ж ты хвалюешся! Гуляеш усяго толькі супраць першай ракеткі свету, — падтрымаў вядучы мерапрыемства цёзку Сабаленкі — дзяўчынку, якой трэба было некалькі хвілін пагуляць з найлепшай тэнісісткай свету.

І трэба сказаць, дзяўчынка трымалася вельмі нядрэнна.

Неўзабаве пасля гэтага тэнісістка адышла да краю пляцоўкі і пераўвасобілася ў трэнера.

— Увогуле не зайздрошчу вам, што мікрафон цяпер дастаўся мне. Зараз самы строгі трэнер Арына пачне, — усміхаючыся, сказала Сабаленка і пачала вучыць юных тэнісістаў:

— Дзяўчынка, куды ты плячыма круціш? Трымайся прама. Вось, малайчына…

Каго-небудзь тэнісістка нават асабіста вылучыла.

— Так выдатна закруціў мяч! Гэта ў нас будучы Надаль. Хоць не, хутчэй Алькарас, — пахваліла Арына маладога хлопца.

А калі праз некалькі секунд пасля гэтага мяч вылецеў за межы корта, за яго ледзь не пабіліся некалькі дзяцей. Пераможцу «бітвы» ў выніку дазволілі пакінуць мяч сабе.

А тым часам за кортам заўзятары адчайна спрабавалі любым спосабам прыцягнуць увагу Сабаленкі.

— Можа, яна тут убачыць мяне, стаю такая! — ледзь не са слязамі на вачах сказала юная заўзятарка, якая апынулася ў першым шэрагу з плакатам.

— Ой, дык яна ўжывую сэксі, — раптам прагучала недзе з натоўпу.

Напрыканцы адкрытай трэніроўкі Сабаленка выказала сваю павагу юным тэнісістам. Сярод тых, хто гуляў з ёй, дарэчы, быў і не зусім малады Дзмітрый Бага — былы футбаліст БАТЭ і зборнай Беларусі.

— Я ў свой час не ведала, што такое кручэнне мяча. А тут усе гэта ўмеюць. Найбліжэйшым часам у нас можа нарадзіцца не адна зорачка. Адна — гэта базавы мінімум, а нам патрэбны раскошны максімум! — сказала Сабаленка.

«Эксклюзіву не будзе»

Журналістам падабрацца да тэнісісткі аказалася немагчыма. Яшчэ напярэдадні мы атрымалі своеасаблівыя правілы, у якіх былі прапісаныя важныя нюансы. Журналістам па-за сцэнарыем мерапрыемства забаранялася набліжацца да Сабаленкі з асабістымі пытаннямі, просьбамі аб інтэрв’ю і нават задаваць пытанні прадстаўнікам яе каманды. Акрамя таго, нам далі зразумець: эксклюзіўных матэрыялаў не будзе.

На мерапрыемстве быў і Максім Мірны

Напрыканцы майстар-класа карэспандэнтам абяцалі прэс-падыход, але ў выніку абышліся без яго. Абмежаваліся зносінамі з гледачамі, пытанні для якіх трэба было дасылаць загадзя. Акрамя таго, слова далі дзецям, якія прыйшлі на мерапрыемства.

Паводле слоў самой Арыны, яе ідэальны дзень — гэта прачнуцца аб 11 гадзіне раніцы, смачна паесці і прабавіць час з сябрамі і роднымі.

Самы складаны турнір — пераможны для яе Australian Open — 2023, а сёлета — «Ралан Гарос», на якім яна выбыла ў 1/8 фіналу.

Шмат пытанняў было пра эмацыйнасць тэнісісткі. Арына расказала, што крычыць мацней за ўсю сваю каманду, але пры гэтым чуе і іх. Таксама яна параіла моладзі не ламаць ракеткі ў парыве злосці, бо цяпер яны каштуюць дорага.

Пасля адкрытай трэніроўкі арганізатары правялі два чэленджы. Першы — трапіць у патрэбны квадрат, які называла Сабаленка, з маскай для сну на вачах. У выніку толькі палова ўдзельнікаў змагла трапіць па мячы. Сама Арына таксама прамахнулася з першай спробы, але потым выправілася.

Пазней тэнісістка згуляла з моладдзю ў тэнісныя крыжыкі-нулікі: куды трапляў мяч, туды і ставілі крыжык або нулік. Пасля гэтага наступіў невялікі перапынак перад аўтограф-сесіяй, перад пачаткам якой утварылася вялікая чарга.

Праўда, парадаваць Сабаленцы ўдалося не ўсіх. За паўгадзіны яна раздала 350 аўтографаў — і ўсё. Некаторыя заўзятары, якія прыйшлі з плакатамі, засталіся расчараваныя: тэнісістка распісвалася толькі на аркушах, каб зэканоміць час.

— Зорка стамілася — гучна сказаў адзін з ахоўнікаў, спрабуючы не прапусціць нікога да тэнісісткі. У некаторых выпадках гэта нават прагучала крыху груба. Заўзятарам таксама раздавалі загадзя падпісаныя карткі, але і гэтага хапіла не ўсім.

Напрыканцы выступіла і сама Арына.

— Спадзяюся, у найбліжэйшай будучыні мы яшчэ арганізуем такія мерапрыемствы, і я змагу падзяліцца часцінкай сябе з кожным з вас. Я старалася як магла, распісвалася як магла. Мне здаецца, трэба будзе зрабіць асобны масаж для маёй рукі, бо ўсё анямела. Але дзякуй вам за падтрымку! — завяршыла Арына, пасля чаго зрабіла сэлфі і ў акружэнні сямі чалавек у касцюмах накіравалася за межы кортаў.

Каментары да артыкула