У Румыніі расійскі дрон трапіў у шматпавярховік
Узнік пажар.
Скрыншот відэа
У ноч на пятніцу ў горадзе Галац беспілотнік упаў на дах шматкватэрнага жылога дома. У Міністэрстве абароны Румыніі заявілі, што гаворка ідзе пра расійскі беспілотнік, піша Бі-бі-сі.
«У ноч з 28 на 29 мая Расійская Федэрацыя аднавіла атакі дронаў на цывільныя і інфраструктурныя аб’екты ва Украіне, паблізу рачной мяжы з Румыніяй, — гаворыцца ў паведамленні Мінабароны Румыніі. — Адзін з гэтых беспілотнікаў увайшоў у паветраную прастору Румыніі, быў зафіксаваны радарам да паўднёвай часткі горада Галац і ўрэзаўся ў дах шматкватэрнага дома, у выніку чаго ўзнік пажар».
Паводле даных экстранных службаў Румыніі, у выніку інцыдэнту пацярпелі два чалавекі, ім аказалі дапамогу на месцы.
Як паведамлялі Паветраныя сілы УСУ, у гэты момант Расія масіравана атакавала дронамі Адэскую вобласць (Галац знаходзіцца недалёка ад рэгіёна).