На месцы апошняга канцэрта The Beatles створаць музей

На месцы апошняга канцэрта гурта The Beatles у Лондане плануюць адкрыць музей, прысвечаны гісторыі калектыву. Новая культурная прастора атрымае назву The Beatles at 3 Savile Row і павінна адкрыцца ў 2027 годзе, піша The Guardian.

The Beatles. Фота: Wikimedia Commons

Музей размесцяць у будынку на вуліцы 3 Savile Row, дзе ў 1960‑х знаходзіўся офіс кампаніі Apple Corps, створанай музыкамі гурта. Менавіта на даху гэтага дома ў студзені 1969 года адбыўся апошні публічны выступ The Beatles.

У новым комплексе плануюць зрабіць пастаянную экспазіцыю з архіўнымі матэрыяламі Apple Corps, часовыя выставы, сувенірную краму і адноўленую студыю, дзе музыкі працавалі над альбомам Let It Be. Наведвальнікам таксама адкрыюць доступ на легендарны дах.

Праект падтрымалі ўдзельнікі гурта Пол Макартні і Рынга Стар. Макартні адзначыў, што гэтае месца захоўвае для яго шмат асабістых успамінаў, а Стар назваў будучае адкрыццё «вяртаннем дадому».

Кампанія Apple Corps пасля распаду The Beatles займалася захаваннем спадчыны гурта. Цяпер яна зноў выкупіла будынак, які пакінула яшчэ ў 1976 годзе.

Апошні канцэрт The Beatles на даху стаў легендарным: гурт выканаў песні Get Back, Don’t Let Me Down, I’ve Got a Feeling, One After 909 і Dig a Pony. Выступ сабраў натоўп на вуліцы і ў выніку быў спынены паліцыяй.

Каментары да артыкула