Што вядома пра палітвязняў, памілаваных перад 8 Сакавіка
Хутчэй за ўсё, спынілі пераслед хатніх хімікаў, а вось з калоній ніхто — ці амаль ніхто — не выйшаў.
5 сакавіка Аляксандр Лукашэнка падпісаў указ аб памілаванні 18 асуджаных. 15 з іх былі асуджаныя па палітычных артыкулах. 11 памілаваных — жанчыны. Ёсць жанчына, якая знаходзіцца на апошніх тэрмінах цяжарнасці. Ёсць дзяўчына, якую арыштавалі ў 16 гадоў. Ёсць дзве сямейныя пары.
Спецпрадстаўнік прэзідэнта ЗША па Беларусі Джон Коўл падзякаваў Лукашэнку, але нагадаў, што Трамп даручыў вызваліць усіх палітвязняў.
Беларускія ўлады традыцыйна не кажуць, хто ўваходзіць у групу памілаваных, пакідаючы інтрыгу — а ці адпусцілі ўвогуле кагосьці?
Выглядае на тое, што памілаванне 5 сакавіка 2026 года амаль цалкам паўтарае пераднавагодняе памілаванне, якое адбылося 30 снежня 2025 года. Хутчэй за ўсё, і тады, і цяпер гаворка ідзе пераважна пра хатніх хімікаў. Яны таксама асуджаныя па палітычных артыкулах, таксама былі незаконна рэпрэсаваныя, але не ўваходзяць у лік тых «1200 палітвязняў», пра якіх кажуць Трамп і праваабаронцы.
«Наша Ніва» распытала жанчын, якія нядаўна вызваліліся з жаночых калоній у Гомелі і ў Зарэччы. Яны не ведаюць пра іншых цяжарных (і асабліва на апошняй стадыі цяжарнасці), апроч Наталлі Левай, якая была індывідуальна памілаваная 19 лютага 2026 года. А схаваць такую інфармацыю ў замкнёнай прасторы складана, амаль немагчыма.
Няма ніякіх сведчаннаў пра вызваленне з калоній кагосьці з сямейных пар — а колькасць такіх асуджаных сужэнцаў, натуральна, невялікая.
Што да памілаванай дзяўчыны, якую пасадзілі ў 16 гадоў, то тут ёсць два варыянты. Калі гэта палітзняволеная, то па ўзросце яна адпавядае толькі Аляксандры Пуліновіч. Дзяўчыне прысудзілі 10 гадоў і 3 месяцы зняволення па справе «Чорных салаўёў» — група маладзёнаў аб’ядналася ў ячэйку на чале з 16‑гадовай украінкай Марыяй Місюк, каб дапамагаць Украіне. Місюк аддалі на радзіму яшчэ ў лістападзе 2025 года.
Пуліновіч — другая дзяўчына ў «Салаўях», астатнія — хлопцы. Іх прысуд уступіў у сілу ў лютым 2026 года. Калі памілаваная насамрэч Пуліновіч, то, магчыма, яна не паспела даехаць да калоніі. У такім разе яе маглі б адпусціць з СІЗА.
Зрэшты, тэарэтычна магла быць памілаваная і нейкая непалітычная дзяўчына.