У Мінску прадаюць бізнэс па дастаўцы VIP-сушы. Іх прывозяць у скрынках з чырвонага аксаміту
Нядаўна ў Мінску выставілі на продаж бізнэс па дастаўцы сушы і ролаў прэміум-класа, заўважыў Office Life. Гаворка пра нашумелы брэнд Black Pearl Sushi. Цана пытання — $13 тысяч.
Установа знаходзіцца побач з ТРЦ Dana Mall. Бізнэс прадаецца ў поўнай камплектацыі — абсталяванне, кухня, сайт, акаўнт у Instagram і гэтак далей.
Black Pearl Sushi пачала працаваць у 2021 годзе. Паводле задумы заснавальнікаў, асноўны акцэнт зрабілі на прэміяльнай якаснай сыравіне — «не рыс з морапрадуктамі, а морапрадукты з рысам».
Як распавядаў заснавальнік Black Pearl Sushi Максім Свірыдаў, на старце ён разам з жонкай уклаў у праект $17 тысяч, першы прыбытак атрымалі толькі праз паўгода. У 2022 годзе ў мэтах далейшага развіцця долю ў 30% прадалі новаму партнёру.
Зараз самы танны сэт («Філадэльфія», 1420 грамаў) тут прапануюць за 180 рублёў, самы дарагі (White Gold, 1580 грамаў) — за 270. Летась сушы і ролы пачалі дастаўляць у скрынках з чырвонага аксаміту.
Аб прычынах продажу бізнэсу не паведамляецца.