Адзін трэнер працуе на Алімпіядзе адразу з 16‑цю фігурыстамі з 13‑ці краін. Толькі паспявай пераапранацца

Падчас спаборніцтваў па фігурным катанні ў аўторак уважлівыя гледачы маглі заўважыць нешта незвычайнае: французскі трэнер Бенуа Рышо з’яўляўся ля борціка ў куртках розных нацыянальных зборных — спачатку Францыі, а пасля Грузіі, піша Бі-бі-сі.

Бенуа Рышо ў куртках розных зборных. Калаж: Бі-бі-сі

38‑гадовы Рышо — трэнер і харэограф. На Зімовых Алімпійскіх гульнях 2026 года ў Італіі ён працуе адразу з 16 фігурыстамі, якія прадстаўляюць 13 розных краін. Пры гэтым у мужчынскай кароткай праграме ў аўторак выступалі сем яго падапечных, хоць у афіцыйным раскладзе ён быў пазначаны як трэнер толькі чатырох спартсменаў.

Паколькі некаторыя яго вучні выступалі адзін за адным, Рышо даводзілася хутка змяняць вопратку. Напрыклад, француз Адам Сяа Хім Фа і грузін Ніко Эгадзэ выходзілі на лёд пад 25‑м і 26‑м нумарамі — таму трэнеру трэба было аператыўна пераапрануцца.

Вынікі ў яго спартсменаў былі розныя, але Сяа Хім Фа пасля кароткай праграмы ідзе трэцім і змагаецца за медаль перад вольнай праграмай у пятніцу.

Гледачы ўжо прызвычаіліся бачыць Рышо ў розных куртках: падчас каманднага турніру ў нядзелю ён спачатку падтрымліваў Эгадзэ ў куртцы зборнай Грузіі, а менш чым праз 15 хвілін з’явіўся ў куртцы Канады, каб падтрымаць Стывена Гогалева.

Сам трэнер прызнаецца, што такая праца патрабуе вялікай арганізаванасці і эмацыйнай вытрымкі. Калі ўсе выступаюць добра, усё праходзіць лягчэй. Але калі адзін спартсмен выступіў няўдала, а наступны — удала, узнікаюць моцныя і супрацьлеглыя эмоцыі, якія складана адразу пераключыць. Ён адзначае, што калі б яго падапечныя выступалі адзін за адным пастаянна, гэта было б вельмі цяжка.

Рышо жартуе, што раней заўсёды насіў чорнае, і людзі смяяліся з гэтага, а цяпер здзіўляюцца, як ён паспявае з’яўляцца ў куртках розных колераў.

Каб паспець змяніць форму, трэнер загадзя пакідае курткі ў распранальнях сваіх спартсменаў, хоць звычайна гэта не дазваляецца. Часам яму дапамагаюць кіраўнікі або менеджары нацыянальных зборных — яны трымаюць курткі напагатове і перадаюць іх у патрэбны момант.

Каментары да артыкула