Алімпіяда яшчэ толькі пачалася, а заваяваныя медалі ў некаторых прызёраў ужо паламаліся

Арганізатары Алімпійскіх гульняў у Мілане і Карціна д'Ампеца пачалі праверку пасля таго, як высветлілася, што некаторыя алімпійскія медалі пашкоджваюцца. Пра гэта яны заявілі, падкрэсліўшы, што надаюць сітуацыі «максімальную ўвагу», піша Бі-бі-сі.

Брызі Джонсан паказвае медаль, які адарваўся ад стужкі. Фота: Andrew Milligan/PA Images via Getty Images

Дзве залатыя прызёркі зборнай ЗША — гарналыжніца Брызі Джонсан і фігурыстка Аліса Лю — расказалі, што стужка аддзялілася ад іхніх медалёў амаль адразу пасля ўзнагароджання.

Джонсан прадэманстравала пашкоджаны медаль журналістам, патлумачыўшы, што мацаванне, якое павінна злучаць стужку з медалём, проста развалілася. Лю апублікавала відэа ў сацыяльных сетках, на якім трымае медаль і стужку асобна, пажартаваўшы, што медаль можа абыходзіцца і без стужкі.

Падобная сітуацыя здарылася і з нямецкай камандай, якая заваявала бронзу ў біятлоне: на відэа відаць, як медаль аднаго са спартсменаў зваліўся са стужкі падчас святкавання ў гатэлі.

Аперацыйны дырэктар гульняў Андрэа Франчызі паведаміў, што арганізатары ведаюць пра праблему і высвятляюць яе прычыны. Ён падкрэсліў, што момант уручэння медаля з’яўляецца адным з самых важных для спартсменаў, таму якасць узнагарод павінна быць бездакорнай.

Прадстаўнік Алімпійскага і Параалімпійскага камітэта ЗША заявіў «Бі-бі-сі», што чакае рашэння ад арганізатараў. Пакуль невядома, ці атрымаюць спартсмены новыя медалі замест пашкоджаных.

Гэта не першы выпадак, калі ўзнікаюць пытанні да якасці алімпійскіх узнагарод. Пасля Алімпійскіх гульняў у Парыжы 2024 года было пададзена каля 220 запытаў на замену медалёў з-за зносу і пашкоджанняў. Некаторыя атлеты, у прыватнасці брытанская скакуха ў ваду Ясмін Харпер, заўважалі, што медалі неўзабаве пасля ўручэння пачыналі цямнець. Арганізатары Парыжа-2024 тады паабяцалі замяніць усе пашкоджаныя ўзнагароды.

Каментары да артыкула